Habit Angela Merkel: Fajin për luftën Rusi-Ukrainë e ka Polonia

Ish-kancelarja gjermane, Angela Merkel, ka bërë deklarata të forta në një intervistë për median hungareze online, Partizan, ku akuzon Poloninë dhe vendet baltike për prishjen e marrëdhënieve diplomatike midis Bashkimit Evropian dhe Rusisë. Sipas saj, ky fakt kontribuoi në mënyrë indirekte në agresionin rus ndaj Ukrainës.

Merkel rikujtoi Marrëveshjen e Minskut të vitit 2015, të cilën ajo ndihmoi të negociohej dhe që solli një periudhë qetësie midis viteve 2015 dhe 2021, duke i dhënë Ukrainës kohë të forcohej.

Ajo tha se në qershor 2021 kuptoi se presidenti rus Vladimir Putin nuk e merrte më seriozisht këtë marrëveshje dhe kërkoi të nisë një dialog të ri direkt me Putinin, përmes Bashkimit Evropian. Megjithatë, shtete si Polonia dhe vendet baltike nuk e mbështetën këtë përpjekje.

“Disa shtete nuk e mbështetën këtë, kryesisht vendet baltike dhe Polonia,” tha Merkel, duke shtuar se ato kishin “frikë” se politika evropiane ndaj Rusisë nuk do të funksiononte.

Merkel theksoi gjithashtu se mungesa e takimeve ballë për ballë për shkak të pandemisë së koronavirusit pengoi arritjen e kompromiseve dhe ndihmoi në radikalizimin politik të Rusisë, që më pas çoi në sulmin ndaj Ukrainës. “Videokonferencat nuk ishin të mjaftueshme,” tha ajo.

Këto deklarata kanë shkaktuar një debat të gjerë, pasi interpretimi i ish-kancelarës sfidon shumë analiza ndërkombëtare që e shohin ofensivën ruse si një plan afatgjatë të Kremlinit, të pavarur nga politika e vendeve baltike apo ndikimi i pandemisë.

Angela Merkel, që udhëhoqi Gjermaninë nga 2005 deri në 2021, mbetet një figurë kyçe në debatet për politikën evropiane dhe marrëdhëniet me Rusinë.