Në pranga kuzhinieri dhe teknologu i kompanisë së kateringut, 1 person tjetër në kërkim

Zbardhen detaje të reja nga skandali i helmimit të disa studentëve në Akademinë e Sigurisë. Komisariati i Policisë Nr. 1 ka arrestuar dy persona dhe ka shpallur një tjetër në kërkim, në kuadër të hetimeve për ngjarjen.

Burime bëjnë me dije se në pranga kanë rënë teknologu dhe kuzhinieri i kompanisë së kateringut, e cila siguronte ushqimin për tre vaktet ditore të studentëve. Ndërkohë, në kërkim është shpallur administratorja e kësaj kompanie, Alma Tafani.

Sipas të dhënave, studentët e prekur kanë shfaqur simptoma të forta helmimi, përfshirë të vjella dhe dhimbje të theksuara barku. Ata janë paraqitur në spital, ku kanë marrë trajtimin e nevojshëm mjekësor, përfshirë serume dhe medikamente, dhe më pas janë larguar pasi gjendja e tyre është stabilizuar.

Autoritetet vijojnë hetimet për të përcaktuar shkakun e saktë të helmimit dhe për të nxjerrë përgjegjësit përpara ligjit.