Arrestohet 43-vjeçari në Bërxullë, iu gjet pistoletë me 7 fishekë

Policia e Tiranës ka intensifikuar kontrollet në terren në kuadër të operacionit të koduar “Risku”, duke finalizuar me arrestimin në flagrancë të një 43-vjeçari në zonën e Bërxullës. I ndaluari, Juljan Koni, u kap gjatë kontrolleve të ushtruara në banesën e tij, ku u sekuestruan një armë zjarri pistoletë, një krehër dhe 7 fishekë, të cilat dyshohet se i posedonte në mënyrë të paligjshme.

Ky operacion vjen vetëm një javë pas ngjarjes së rëndë ku humbi jetën 50-vjeçari Edmond (Ali) Sula, ndërsa autoritetet po punojnë për të parandaluar përfshirjen e personave të armatosur në incidente të tjera kriminale.

Sipas policisë, arrestimi u krye në kushtet e flagrancës, ndërsa ndaj 43-vjeçarit rëndon akuza për “Mbajtje pa leje dhe prodhim i armëve, armëve shpërthyese dhe i municionit”. Veprimet u ndërmorën nga specialistët e Sektorit për Hetimin e Krimeve të Rënda, të cilët po vijojnë kontrollet dhe verifikimet në zona të ndryshme të kryeqytetit.

Materialet procedurale i janë referuar Prokurorisë së Tiranës për ndjekje të mëtejshme ligjore, ndërsa operacioni pritet të shtrihet edhe në ditët në vijim me fokus identifikimin e elementëve që paraqesin rrezik për sigurinë publike.