Horror në Kosovë, prindërit dhunojnë barbarisht 5-vjeçarin

Një rast tronditës është raportuar në Prishtinë, ku një fëmijë vetëm 5 vjeç dyshohet se ka qenë viktimë e dhunës dhe keqtrajtimit të vazhdueshëm nga prindërit e tij.

I mituri është transportuar me urgjencë në Klinikën e Pediatrisë, ku ndodhet nën kujdes intensiv. Burime mjekësore bëjnë me dije se ai i është nënshtruar një ndërhyrjeje kirurgjikale në zonën e shputave, e realizuar nga ekipet e Ortopedisë dhe Kirurgjisë Plastike. Gjatë operacionit gjendja e tij është mbajtur stabël, ndërsa aktualisht vijon trajtimin dhe monitorimin e vazhdueshëm nga mjekët.

Sipas autoriteteve, prindërit e fëmijës, të identifikuar me inicialet A.K. dhe V.P., janë ndaluar nga policia dhe ndaj tyre është vendosur masa e paraburgimit prej një muaji. Ata dyshohen për kryerjen e veprave penale “Shkelja e detyrimeve familjare” dhe “Lëndim i rëndë trupor”.

Rasti ka shkaktuar reagime të forta në opinionin publik, ndërsa organet hetimore po vijojnë punën për të zbardhur plotësisht rrethanat dhe përgjegjësitë në këtë ngjarje të rëndë.