“I shkoi në orën 22:30”, Ndreca zbardh detaje të reja nga takimi i Gogut me Veliajn

Avokati i kryebashkiakut të Tiranës, Erion Veliaj, Plarent Ndreca, ka zbardhur detaje të reja lidhur me takimin mes klientit të tij dhe ministrit të Drejtësisë, Toni Gogu, në ambientet e burgut.

Në një prononcim për mediat, pas shtyrjes së seancës gjyqësore ku Veliaj nuk ishte i pranishëm, Ndreca ka treguar se ministri ka shkuar për të takuar kryebashkiakun rreth orës 22:30 të mbrëmjes dhe ka qëndruar me të për rreth një orë e gjysmë.

Sipas avokatit, takimi është zhvilluar në zyrën e drejtorit të burgut, ndërsa ai pretendon se Veliaj nuk ka paraqitur asnjë kërkesë zyrtare për t’u takuar me ministrin.

Ndreca ka vënë në pikëpyetje mënyrën dhe orarin e këtij takimi, duke argumentuar se një vizitë e ministrit në institucionin e vuajtjes së dënimit, nëse kishte për qëllim verifikimin e kushteve apo ushtrimin e kompetencave zyrtare, duhej të realizohej përmes një procedure institucionale dhe në praninë e inspektorëve përkatës.

“Veliaj nuk ka bërë asnjë kërkesë për të takuar Gogun. Ai nuk mund të shkojë në orën 22:30 të darkës. Nëse do të shkonte për zbatimin e detyrës, duhet të shkonte në mënyrë zyrtare, jo të takonte për një orë e gjysmë një person nën hetim në zyrën e drejtorit të burgut. Nëse ka qëllim të inspektojë kushtet në burg, duhet të shkojë me inspektorë”, deklaroi Ndreca.

Deklarata e avokatit rikthen në vëmendje pikëpyetjet mbi vizitën e ministrit të Drejtësisë në burg, veçanërisht për orarin e pazakontë dhe kohëzgjatjen e takimit me Veliajn, ndërsa ky i fundit ndodhet nën hetim.