Një vrasje me armë zjarri ka tronditur sërish Shkodrën. Një person ka mbetur i vrarë dhe një tjetër është plagosur si pasojë e një sulmi me armë zjarri. Ngjarja ka ndodhur pranë një lokali ngjitur me godinën e Bashkisë Shkodër, ku është qëlluar me breshëri plumbash . Viktimë ka mbetur Armando Pali, ndërsa i plagosur është Erogen Vaso, i njohur edhe me emrin Erogen Brajoviç, një kamarier dhe një grua. Policia ka rrethuar zonën dhe po punon për identifikimin dhe kapjen e autorëve, ndërsa ende nuk janë bërë të ditura motivet e kësaj vrasjeje.

Erogen Brajoviç, i njohur gjithashtu si Erogen Vaso, është një figurë e njohur në Shkodër për lidhjet e tij me grupe kriminale dhe përfshirjen në politikën lokale. Emri i tij doli në vitin 2023 si i lidhur me grupin e Bajrave në Shkodër. Në vitin 2007, ai u akuzua për veprën penale të “shtrëngimit me anë të kanosjes ose dhunës për përfitim të pasurisë”, e njohur ndryshe si gjobëvënie. Pas kësaj akuze, ai ka qenë anëtar i këshillit bashkiak në Shkodër me Partinë Bashkimi për Drejtat e Njeriut, që drejtohet nga Vangjel Dule, dhe më vonë është bërë pjesë e Partisë Socialiste. Në vitin 2018, ai u arrestua gjatë një aksioni të Policisë së Shtetit në Shkodër, ku u cilësua si një nga “elementët me rrezikshmëri shoqërore të lartë” dhe anëtar i grupeve kriminale aktive në këtë territor. Gjatë hetimeve, u zbuluan lidhje të tij me figura të njohura politike dhe të policisë, duke përfshirë foto me deputetin socialist Luan Harusha dhe shefa të komisariatit të Shkodrës. Megjithatë, motra e tij, Borana Spiro, ka mohuar akuzat dhe ka deklaruar se Erogeni është një person i qetë dhe nuk është përfshirë në aktivitete kriminale. Në vitin 2023, ai shpalli kandidaturën për të drejtuar Bashkinë e Shkodrës, por nuk arriti të fitonte.

Një person ka rënë në pranga për atentatit në Shkodër. Ende nuk bëhet e qartë nëse është qitësi, apo bashkëpunëtor në këtë ngjarje. Dyshohet se shënjestra ishte Erogen Brajoviç, i cili mbeti i plagosur. Viktima ish anëtar i këshillit bashkiak të qytetit.