Integrimi në BE, mbahet sot në Tiranë konferenca ndërparlamentare

Tirana pret sot Konferencën Ndërparlamentare me temë “Agjenda strategjike për zgjerimin e BE-së dhe anëtarësimin e Shqipërisë”, një aktivitet ku në fokus do të jetë procesi i integrimit europian të vendit.

Në konferencë pritet të marrin pjesë përfaqësues të institucioneve shqiptare, Parlamentit Europian dhe parlamenteve të vendeve europiane. I pranishëm do të jetë edhe kryeministri Edi Rama, i cili do të mbajë një fjalë përshëndetëse.

Aktiviteti do të përshëndetet gjithashtu nga kryetari i Kuvendit, Niko Peleshi, ambasadorja e Bashkimit Europian në Shqipëri, Sofia Moreira de Sousa, si dhe raportuesi për Shqipërinë në Parlamentin Europian, Andreas Schieder. Në konferencë priten edhe përfaqësues të tjerë të nivelit të lartë nga institucionet shqiptare dhe europiane.

Diskutimet do të fokusohen te procesi i zgjerimit të Bashkimit Europian dhe hapat që Shqipëria duhet të ndërmarrë në kuadër të rrugëtimit drejt anëtarësimit. Në qendër të debateve do të jenë gjithashtu reformat, stabiliteti dhe roli i parlamenteve në avancimin e procesit të integrimit.

Tre sesione për zgjerimin dhe integrimin europian

Konferenca do të ndahet në tre sesione kryesore, ku do të trajtohen çështje që lidhen drejtpërdrejt me perspektivën europiane të Shqipërisë.

Sesioni i parë do t’i kushtohet agjendës së zgjerimit të BE-së dhe rrugës së Shqipërisë drejt anëtarësimit, me fokus te procesi i negociatave dhe angazhimet që lidhen me integrimin.

Në sesionin e dytë do të diskutohet zgjerimi i Bashkimit Europian si faktor strategjik për reformat, stabilitetin dhe sigurinë, duke trajtuar dimensionin më të gjerë politik dhe strategjik të procesit.

Ndërsa sesioni i tretë do të fokusohet te udhëheqja parlamentare dhe angazhimi për avancimin e integrimit europian, me theks te roli i institucioneve legjislative në procesin e reformave.

Konferenca do të moderohet nga kryetari i Komisionit për Europën dhe Punët e Jashtme, Igli Hasani, së bashku me përfaqësues të parlamenteve të vendeve pjesëmarrëse.

Aktiviteti vjen në një periudhë kur procesi i integrimit europian vijon të jetë një prej prioriteteve kryesore të agjendës institucionale të Shqipërisë, ndërsa Tirana synon avancimin e mëtejshëm të negociatave me Bashkimin Europian.