Ish-lojtari i Kombëtare Shqiptare arrestohet në Francë për kokainë

Një ngjarje e rëndë ka tronditur opinionin sportiv në Shqipëri. Ish-mbrojtësi i Kombëtares shqiptare dhe i Partizanit, Olgert Muka, është arrestuar në Francë, ku akuzohet për shitje të lëndëve narkotike.

Sipas raportimeve, 46-vjeçari nga Lushnja është kapur nga autoritetet franceze duke shitur kokainë. Rasti tashmë ndodhet në duart e drejtësisë franceze, e cila pritet të vendosë për masën e dënimit ndaj ish-futbollistit.

Në dëshminë e tij, Muka ka deklaruar se vështirësitë ekonomike e shtynë të përfshihej në këtë aktivitet të paligjshëm.

Olgert Muka e nisi karrierën futbollistike në akademinë e Lushnjës, për të vijuar më pas me Teutën, Dinamon, Bylisin, Flamurtarin, Partizanin, Besën dhe Memaliajn, ku edhe mbylli karrierën si lojtar.

Gjatë karrierës së tij ai fitoi Kupën e Shqipërisë me Dinamon dhe Superkupën e Shqipërisë me Partizanin.

Me fanellën e Kombëtares shqiptare, Muka regjistroi dy paraqitje në periudhën kur skuadra drejtohej nga trajneri Sulejman Demollari.

Arrestimi i tij ka shkaktuar reagime në opinionin sportiv, ndërsa priten zhvillime të tjera nga hetimet dhe procesi gjyqësor në Francë.