Shqipëria nis përgatitjet për Finlandën, Cake rikthehet në stërvitje

Pas triumfit ndaj San Marinos, Kombëtarja shqiptare ka kthyer menjëherë vëmendjen te sfida e radhës në Nations League, ku kuqezinjtë do të përballen me Finlandën në transfertë.

Skuadra e drejtuar nga Rolando Maran ka vijuar përgatitjet në Itali, teksa seanca e radhës stërvitore u zhvillua në stadiumin “Dino Manuzzi” të Cesenës. Programi i punës u përshtat sipas ngarkesës së futbollistëve dhe minutave të luajtura në ndeshjen ndaj San Marinos.

Lojtarët që ishin titullarë apo patën më shumë minuta në sfidën e fundit iu nënshtruan një programi rikuperues, me qëllim që të riktheheshin në gjendjen optimale fizike për ndeshjen e ardhshme.

Ndërkohë, pjesa tjetër e ekipit zhvilloi një seancë më intensive, e cila përfshiu ushtrime fizike, elementë teknikë dhe taktikë, si dhe punë specifike me skemat e lojës dhe situata të ndryshme që mund të shfaqen gjatë përballjes me Finlandën.

Një lajm pozitiv për stafin teknik është rikthimi i Klisman Cake. Mbrojtësi është rikuperuar në kohë dhe tashmë është bashkuar me grupin, duke qenë i gatshëm për sfidën e radhës.

Kombëtarja shqiptare do të zhvillojë të enjten paradite seancën e fundit stërvitore në stadiumin “Dino Manuzzi”, përpara nisjes drejt Helsinkit, ku kuqezinjtë do të përballen me Finlandën.

Ndeshja Finlandë–Shqipëri është programuar të luhet të shtunën, më 3 tetor, duke nisur në orën 15:00. Sfida pritet të jetë një tjetër test i rëndësishëm për skuadrën kuqezi në Nations League.