‘Kalova lumin, të dh**sha kalin’, Kuvendit s’pyet për hallet e qytetarëve

Seanca parlamentare e kësaj të enjteje është shoqëruar me një situatë të pazakontë, pasi vetëm një orë e gjysmë nga nisja e saj, pjesa më e madhe e deputetëve kanë braktisur sallën. Karriget bosh kanë dominuar ambientin, ndërkohë që në foltore ka vijuar diskutimi nga deputetja e Partisë Demokratike, Jorida Tabaku.

Ajo ka paraqitur argumentet e saj në lidhje me Korporatën e Investimeve, në kuadër të një interpelance të kërkuar me kryeministrin Edi Rama. Ky i fundit nuk ka qenë i pranishëm, duke ia deleguar përgjigjet ministres së Ekonomisë, Delina Ibrahimaj.

Gjatë seancës, opozita ka kërkuar gjithashtu interpelancë me ministrin e Brendshëm, Besfort Lamallari. Deputeti demokrat Klevis Balliu ka ngritur shqetësime për atë që e cilësoi si përfshirje të elementëve kriminalë në radhët e Policisë së Shtetit, duke theksuar se kjo nuk është një çështje politike, por një problem që prek drejtpërdrejt sigurinë kombëtare.

Në argumentet e tij, Balliu përmendi disa raste konkrete, përfshirë ish-efektivë të dyshuar për përfshirje në trafik droge, si dhe një episod ku një agjent i AMP-së dyshohet të ketë qenë në të njëjtin automjet me një person të përfshirë në një atentat në zonën e Rinasit.

Nga ana tjetër, ministri Lamallari i hodhi poshtë këto pretendime, duke theksuar se Policia e Shtetit nuk duhet të përfshihet në debatet politike apo në akuza të pabazuara. Ai pranoi se sfidat mbeten, por nënvizoi se është arritur progres i qëndrueshëm në luftën kundër krimit dhe korrupsionit. Sipas tij, statistikat tregojnë një ulje të ndjeshme të vrasjeve, rreth 50%.

Ministri pritet gjithashtu t’u përgjigjet pyetjeve të deputetëve Arjan Ndoja dhe Erald Kapri në vijim të diskutimeve.

Ndërkohë, pjesë e debatit në seancën e sotme ka qenë edhe paralajmërimi i Ambasadës së Shteteve të Bashkuara lidhur me kërcënime të mundshme që lidhen me Iranin, një çështje që ka shtuar tensionin dhe vëmendjen në diskutimet parlamentare.