Takimi i ashtuquajtur “Bordi i Paqes” në Uashington u kthye në ngjarjen më të komentuar të ditës. Përtej deklaratave për rindërtimin e Gazës dhe mesazheve diplomatike, rrjetet sociale u fokusuan te një moment i pazakontë mes liderësh.
Presidenti i Argjentinës, Javier Gerardo Milei, dhe kryeministri i Hungarisë, Viktor Orbán, u panë në një moment informal para nisjes së fjalimit inaugurues të Donald Trump. Në pamjet që po qarkullojnë gjerësisht online, Milei dëgjohet duke kënduar këngën në sfond, ndërsa afron Orbán-in për t’iu bashkuar. Të dy shfaqen të buzëqeshur, në një atmosferë të çlirët që kontraston me seriozitetin e takimit.
Në sfond, presidenti i FIFA, Gianni Infantino, shihet duke i vëzhguar me admirim, një detaj që ka shtuar edhe më shumë interesin e publikut.
Videoja e dy liderëve është bërë virale, duke nxitur komente të shumta mbi afrimitetin mes tyre dhe raportet politike që i lidhin. Momentet spontane mes figurave të larta shtetërore shpesh krijojnë më shumë jehonë sesa vetë deklaratat zyrtare – dhe këtë herë, duket se muzika “rrëmbeu” skenën nga politika.
