“Katunari” i Shqipërisë i shkon Merkelit në takim me avion privat

Provincialët, ose si i pëlqen t’i quajë Edi Rama “katunarët”, dallohen lehtë, kur mundohen të bien në sy prej veshjes, florinjve që varin në qafë, luksit të tepruar dhe sjelljes së shfrenuar.

Udhëheqësit e Shqiptarisë, të cilët përfaqësojnë dy shtetet më të varfëra të Europës kanë mbërritur në Berlin me avionin privat të Behgjet Pacollit, pasunar i pasurive të patundshme që e ka kripur djathin në ish-republikat sovjetike.

Udhëheqësit e dy shteteve më skamnore janë thirrur nga Merkel dhe Macron në një samit për punët e Ballkanit, të cilat kanë shkuar buzë greminës se për Edi Ramën dhe Hashim Thaçin më shumë vlen fjala e Batonit se ajo e Berlinit.

Shkojnë me jat privat në vendin që pas Luftës së Dytë Botërore ka si fill modestinë dhe vetëm modestinë. Ndërtesat gjermane të pushtetit janë minimaliste, sepse gjëma e Luftës së Dytë Botërore u mësoi që përpara nuk ecet me kryet përpjetë.

Udhëheqësit e kostumeve të qepura me porosi mijëra euroshe do të takojnë një grua që nuk e ka ndëruar garderobën prej nja njëzetë vjetëve, pasi thotë që ka dalë për punë, jo për paradë mode.

Këta farë liderësh të kujtojnë parardhësin e tyre, Fatos Nano që shkoi të lypte ndihma Romano Prodit në vitin 1998 dhe kishte mbathur një smoking një numër më të madh, kurse mikpritësi bamirës e priste me një kostum pune, pak të ngrënë në bërryla.