‘Kërdia’ në Kadastrën e Durrësit: 12 të arrestuar dhe nën hetim

Një operacion i gjerë është zhvilluar pasditen e kësaj të enjte në Durrës, ku autoritetet kanë goditur një skemë të dyshuar të tjetërsimit të pronave. Si rezultat i hetimeve, janë ekzekutuar masa sigurie ndaj 12 personave, mes tyre zyrtarë dhe ish-zyrtarë të Agjencisë Shtetërore të Kadastrës.

Sipas të dhënave paraprake, të dyshuarit akuzohen për një sërë veprash penale, mes të cilave mashtrimi, falsifikimi i dokumenteve, shpërdorimi i detyrës dhe pastrimi i produkteve të veprës penale.

Operacioni është pjesë e hetimeve që synojnë zbardhjen e rasteve të dyshuara të tjetërsimit të paligjshëm të pronave në qarkun e Durrësit.

Personat ndaj të cilëve janë caktuar masa sigurie

Masë “Arrest në burg”:

• Ramazan Sheshi, i dyshuar për veprat penale të “Mashtrimit”, “Falsifikimit të dokumenteve” dhe “Pastrimit të produkteve të veprës penale ose veprimtarisë kriminale”.
• Adrian Kona, i dyshuar për “Falsifikim dokumentesh” dhe “Shpërdorim detyre”.
• Bledar Zerba, i dyshuar për “Falsifikim dokumentesh” dhe “Shpërdorim detyre”.
• Rovin Zeqja, i dyshuar për “Falsifikim dokumentesh” dhe “Shpërdorim detyre”.

Masë “Arrest në shtëpi”:

• Shaqir Sheshi, i dyshuar për “Mashtrim” dhe “Falsifikim dokumentesh”.
• Viktor Mataj, i dyshuar për “Mashtrim” dhe “Falsifikim dokumentesh”.
• Arianit Mataj, i dyshuar për “Mashtrim” dhe “Falsifikim dokumentesh”.
• Besnik Xhafa, i dyshuar për “Mashtrim” dhe “Falsifikim dokumentesh”.

Masë “Detyrim paraqitje”:

• Fiqeret Xhafa, e dyshuar për “Mashtrim”, “Falsifikim dokumentesh” dhe “Pastrimin e produkteve të veprës penale ose veprimtarisë kriminale”.
• Jonida Mergeja, e dyshuar për “Shpërdorim detyre”.
• Leandro Dervishi, i dyshuar për “Shpërdorim detyre”.
• Artur Çobani, i dyshuar për “Shpërdorim detyre”.

Autoritetet nuk kanë dhënë ende detaje të plota mbi mekanizmin e skemës së dyshuar, ndërsa hetimet vijojnë për të dokumentuar të gjitha episodet dhe përgjegjësitë e personave të përfshirë.