Këshilli Bashkiak i Maliqit i thotë “jo” bashkimit me Korçën

Këshilli Bashkiak i Maliqit ka kundërshtuar zyrtarisht propozimin për bashkimin e kësaj bashkie me Bashkinë e Korçës, në kuadër të procesit për rishikimin e ndarjes administrativo-territoriale të Shqipërisë.

Çështja u diskutua gjatë mbledhjes së radhës të Këshillit Bashkiak, ku këshilltarët shqyrtuan propozimin për përfshirjen e Bashkisë Maliq në një njësi të përbashkët administrative me Bashkinë Korçë.

Pas diskutimeve, anëtarët e Këshillit Bashkiak shprehën qëndrimin e tyre përmes votimit, duke e rrëzuar propozimin për bashkim.

Në total u hodhën 22 vota, nga të cilat 21 ishin kundër bashkimit me Korçën, ndërsa vetëm një këshilltar votoi pro.

Vendimi i marrë nga Këshilli Bashkiak përbën qëndrimin zyrtar të Bashkisë Maliq lidhur me propozimin për ndryshimin e kufijve administrativo-territorialë.

Mendimi i këshillit pritet t’i përcillet Kuvendit të Shqipërisë, i cili është një prej institucioneve që do të shqyrtojë propozimet në kuadër të procesit të rishikimit të hartës territoriale të vendit.

Votimi në Maliq vjen në një kohë kur reforma e mundshme administrativo-territoriale ka hapur diskutime në disa bashki, veçanërisht për mënyrën se si mund të ndryshojnë kufijtë, organizimi vendor dhe marrëdhëniet mes njësive të qeverisjes vendore.