Khamenei ‘flakë për flakë’ me Trump: Do rrëzohesh si faraonët

Ndërsa prej javësh Irani po përfshihet nga protesta masive kundër regjimit, presidenti i Shteteve të Bashkuara, Donald Trump, ka deklaruar se është i gatshëm të ndërhyjë në mbështetje të protestuesve, nëse situata e kërkon një gjë të tillë.

Në këtë klimë të tensionuar, Udhëheqësi Suprem i Iranit, Ajatollah Ali Khamenei, i ka drejtuar një mesazh me simbolikë të fortë historike dhe fetare presidentit amerikan, duke paralajmëruar se ushtrimi i pushtetit me arrogancë dhe pa respekt çon në mënyrë të pashmangshme drejt disfatës. Në reagimin e tij, Khamenei i referohet figurës së Faraonit, duke theksuar se edhe pse ky i fundit ndodhej në kulmin absolut të fuqisë së tij, zgjodhi rrugën e konfrontimit arrogant dhe konfliktit pa kufij, çka sipas tij solli rënien dhe shkatërrimin e tij.

Në të njëjtën linjë, udhëheqësi suprem iranian sugjeron se një fat i ngjashëm e pret edhe presidentin amerikan, të cilin e etiketon simbolikisht si “Faraoni Trump”, duke e vendosur atë në vazhdën historike të udhëheqësve që, sipas tij, e mbivlerësuan pushtetin dhe ndikimin e tyre.

Khamenei shprehet se “ky baba që rri aty me arrogancë dhe krenari, duke gjykuar të gjithë botën”, duhet ta kuptojë se tiranët dhe figurat arrogante të historisë zakonisht rrëzohen pikërisht në momentin kur ndihen më të fuqishëm se kurrë.

Në mesazhin e tij, ai përmend figura historike si Faraoni, Nimrodi, Reza Khan dhe Mohammad Reza, duke theksuar se të gjithë ata u shembën në kulmin e pushtetit të tyre. Përmes kësaj paraleleje, Khamenei sugjeron se e njëjta rrugë po ndjeket edhe nga udhëheqja aktuale amerikane.

Në përfundim, ai shprehet se Donald Trump “do të rrëzohet gjithashtu”, duke e paraqitur përplasjen mes Iranit dhe Shteteve të Bashkuara jo thjesht si një konflikt politik apo gjeostrategjik, por si një cikël historik dhe moral që, sipas tij, po përsëritet.

آن بابایی که با نخوت و غرور نشسته آنجا راجع به همه‌ی دنیا قضاوت میکند، او هم بداند که معمولاً‌ مستبدّین و مستکبران عالم، از قبیل فرعون و نمرود و رضاخان و محمّدرضا و امثال اینها، وقتی که در اوج غرور بودند سرنگون شدند،
این هم سرنگون خواهد شد.#مثل_فرعون pic.twitter.com/hxzJVQQOiL

— KHAMENEI.IR | فارسی (@Khamenei_fa) January 11, 2026