Klodian Skënderaj merr drejtimin e Dhomës së Avokatisë Tiranë

Klodian Skënderaj është shpallur fitues i garës për drejtimin e Dhomës së Avokatisë së Tiranës, duke siguruar 569 vota në një proces zgjedhor ku morën pjesë tetë kandidatë. Në këtë garë konkurruan gjithashtu Lulzim Alushaj, Sajmir Visha, Edmond Petraj, Gentjana Qendro, Malvina Lika, Mirela Biba dhe Sonila Velo.

Me këtë rezultat, Skënderaj do të mbajë postin e kryetarit për një mandat katërvjeçar, duke marrë drejtimin e një prej institucioneve më të rëndësishme të përfaqësimit të avokatëve në kryeqytet.

Profili akademik dhe profesional

Klodian Skënderaj ka ndërtuar një profil të konsoliduar në fushën e drejtësisë. Ai ka përfunduar studimet e larta në Fakultetin e Drejtësisë pranë Universitetit të Gjenovës në Itali në vitin 2005. Karriera e tij akademike vijoi me përfundimin e doktoraturës në të drejtën procedurale penale në vitin 2013, ndërsa që prej vitit 2016 mban titullin “Profesor i Asociuar”.

Në fushën e botimeve, ai është autor i librit “Ekzekutimi i Vendimeve Penale”, një tekst i përdorur gjerësisht në programet Master Shkencor dhe Profesional Penal në Fakultetin e Drejtësisë të Universitetit të Tiranës.

Prej vitit 2018, Skënderaj është i angazhuar si ekspert në Shkollën e Magjistraturës, në kuadër të programit të trajnimit të vazhdueshëm. Paralelisht, ai ka kontribuar në projekte të ndryshme me organizata dhe shoqata, duke u fokusuar kryesisht në çështje që lidhen me legjislacionin procedural penal dhe të drejtën penale materiale.

Që nga shtatori i vitit 2020, ai është pjesë e Senatit Akademik të Universitetit të Tiranës. Gjithashtu, ka qenë aktiv në konferenca shkencore brenda dhe jashtë vendit, ku ka prezantuar punime akademike dhe ka botuar artikuj në revista të specializuara.