Ku është prezenca e Elton Arbanës? Shijaku ‘gozhdohet’ me plehra

Në Shijak, mbeturinat janë bërë pjesë e përditshme e peizazhit urban. Qyteti ngjan më shumë me një “depo gjigante” plehrash sesa me një bashki që funksionon. Rrugët, lagjet dhe hapësirat publike janë kthyer në pika grumbullimi, ndërsa era e rëndë e ndotjes është bërë shoqëruese e përhershme e jetës së qytetarëve.

Në krye të këtij realiteti qëndron kryebashkiaku Elton Arbana, i pranishëm shpesh në evente, inaugurime dhe para kamerave, por thuajse i padukshëm në rrugët e qytetit që drejton.

Në rrjetet sociale flitet për investime dhe zhvillim, por Shijaku real është i mbuluar nga mbeturinat. Kazanët tejmbushen çdo ditë, rrugët duken të braktisura, dhe shërbimi i pastrimit, sipas banorëve, është pothuajse inekzistent.

Në një video të publikuar nga joq, duken qartë grumbullime plehrash të cilat janë ngjitur me rrugën e automjeteve.

Ironikisht, e vetmja gjë që duket se funksionon me rregull është prania virtuale e kryetarit, në takime e foto zyrtare. Ndërkohë, mungesa e tij është e dukshme aty ku ndotja dhe pakënaqësia janë më të mëdha.

Sot, qyteti është bërë pasqyra më e qartë e një pushteti lokal që di të bëjë “show”, por jo punë. Shijaku nuk ka më nevojë për postime, por për pastrim  real, jo mediatik.