Kush është Joni Keta, kandidatura për kreun e BKH

Joni Keta, 37 vjeç, është kandidatura e propozuar nga Prokuroria e Posaçme për drejtimin e Byrosë Kombëtare të Hetimit, krahu ekzekutiv i #SPAK-ut. Gjatë muajit të shkuar, Keta ishte edhe një ndër bashkëbiseduesit e drejtorit për Çështjet e Europës Perëndimore e Qendrore të Departamentit amerikan të Shtetit, Mark Fleming, në vizitën e tij në Tiranë.

Fusha e kompetencës së Byrosë Kombëtare të Hetimit është hetimi i veprave penale të korrupsionit dhe krimit të organizuar, si dhe veprave të tjera penale të kryera vetëm nga zyrtarët e lartë, të pavarur nga çdo ndikim i paligjshëm, i brendshëm apo i jashtëm.

Në bazë të Kushtetutës, BKH heton Presidentin e Republikës, Kryetarin e Kuvendit, Kryeministrin, anëtarët e Këshillit të Ministrave,
Gjyqtarët e Gjykatës Kushtetuese dhe të Gjykatës së Lartë, Prokurorin e Përgjithshëm, Inspektorin e Lartë të Drejtësisë, Kryetarin e Bashkisë, deputetin, zëvendësministrin,
antarin e Këshillit të Lartë Gjyqësor dhe të Këshillit të Lartë të Prokurorisë, drejtues të institucioneve qendrore ose të pavarura të përcaktuara në Kushtetutë ose në ligj, si dhe akuzat kundër ish- funksionarëve të sipërpërmendur.

Byroja heton këto vepra penale:

a. Korrupsioni aktiv/pasiv i personave që ushtrojnë funksione publike;
b. Korrupsioni aktiv/pasiv i nëpunësve të huaj publikë;
c. Korrupsioni aktiv/pasiv i funksionarëve të lartë shtetërorë ose të zgjedhurve vendor;
d. Shkelja e barazisë së pjesëmarrësve në tendera apo ankande publike;
e. Korrupsioni aktiv i dëshmitarit, i ekspertit ose përkthyesit;
f. Korrupsioni pasiv i gjyqtarëve, prokurorëve dhe funksionarëve të tjerë të organeve të drejtësisë, etj;
g. Çdo vepër penale e kryer nga grupi i strukturuar kriminal, organizata kriminale, organizata terroriste dhe banda e armatosur, sipas përcaktimeve të Kodit Penal.