Kush ia bëri ‘gjëmën’? Prapaskenat e shpalljes non grata të Artan Hoxhës

Gazetari Artan Hoxha ka treguar se si u ndalua dhe u shpall i padëshiruar nga autoritetet greke dy ditë më parë. Ai tha se gjatë kalimit të kufirit u përball me një situatë të papritur, ndërsa autoritetet nuk i dhanë asnjë shpjegim zyrtar për vendimin.

Sipas Hoxhës, gjithçka ndodhi pasi pasaporta e tij u skanua në sistem. “Më ndaluan menjëherë në kontrollin e parë dhe më komunikuan se kishte një problem me dokumentet e mia. Nuk ma kthyen pasaportën dhe më dërguan te një zonë dytësore kontrolli, pranë postës policore,” tha ai.

Ai tregon se procedurat që i kërkuan i ngjanin atyre që aplikohen për persona me precedent penal. “Më kërkuan të lija gjurmët e gishtave dhe të bëja skanimin e retinës. U shpjegova se nuk kam asnjë çështje penale as në Greqi e as gjetkë, por oficeri më tha se nuk mund të merrja pasaportën pa kryer këto procedura,” deklaroi Hoxha.

Pas kësaj, nisi një intervistim i papritur. Gazetari thotë se u step kur një prej oficerëve e pyeti për qëndrimet e tij ndaj Greqisë. “Më tha: ‘Pse ke mbajtur këtë qëndrim ndaj Greqisë?’. U habita, sepse nuk kam asnjë lloj fobie apo qëndrimi negativ ndaj vendit. Përkundrazi, kam qenë i angazhuar edhe gjatë fushatës së vitit të kaluar për zgjedhjet europiane,” u shpreh ai.

Sipas Hoxhës, e vetmja arsye që mund të ketë çuar në shpalljen e tij non-grata lidhet me prononcimet e tij publike për çështjen e Fredi Belerit. Ai rrëfeu se gjatë periudhës kur Beleri hyri në politikën greke dhe shpalli kandidaturën, media të ndryshme në Greqi publikuan materiale të ndryshme për të, një pjesë e të cilave ia kishin dërguar edhe atij. “Duket se ekspozimi i së kaluarës së tij ka krijuar pakënaqësi, sidomos duke treguar se si drejtësia greke ka ndihmuar persona me probleme të shmangin ekstradimin në Shqipëri,” përfundoi Hoxha.