Kush ishte Elvis Shkambi që vrau gjyqtarin Kalaja? Studioi për histori, por nuk u diplomua

Ngjarja e rëndë që tronditi dje Gjykatën e Apelit ka marrë jehonë edhe jashtë vendit. Elvis Shkambi, 30 vjeç, hyri i armatosur në sallën e gjyqit dhe hapi zjarr ndaj gjyqtarit Astrit Kalaja, duke e lënë të vdekur në vend dhe plagosur dy persona të tjerë.

Pamjet e kamerave të sigurisë e tregojnë autorin pak minuta pas ngjarjes, i qetë dhe me duar në xhepa përpara gjykatës. Teksa forcat e policisë e kërkonin, Shkambi ngriti duart duke u dorëzuar me fjalët: “Jam unë”.

Një ditë pas arrestimit, tensioni u rrit edhe më shumë pas deklaratave të xhaxhait të tij, i cili paralajmëroi hapur se “kushdo që do ta dënojë nipin, do të ketë të njëjtin fat si Astrit Kalaja”. Në fjalën e tij, ai akuzoi shtetin për vrasjen dhe theksoi se nipi ishte “djalë i shkolluar me 16 vite”. Dokumentet tregojnë se Shkambi ka qenë i regjistruar në programin “Histori” në vitet 2013-2014, por nuk është diplomuar.

Ngjarja ka ngritur alarmin për sigurinë në sallat e gjyqeve dhe ka shkaktuar debat të gjerë mbi masat e kontrollit dhe përgjegjësinë institucionale.