Mbledhja urgjente në selinë rozë, zbardhen porositë e Ramës

Kryeministri Edi Rama zhvilloi sot një mbledhje me deputetët e Partisë Socialiste në selinë qendrore të forcës politike. Sipas burimeve, fokusi kryesor i diskutimeve ishte rivitalizimi i strukturave të partisë dhe forca e organizimit në terren.

Gjatë takimit është theksuar nevoja për të forcuar komunikimin me bazën dhe për të shtuar kontaktet e drejtpërdrejta me qytetarët në çdo zonë. Rama ka kërkuar gjithashtu që ekipi politik të mbetet aktiv dhe i gatshëm për çdo skenar elektoral që mund të shfaqet.

Në këtë mbledhje morën pjesë deputetët e Qarkut të Tiranës, si edhe grupi që po punon në mbështetje të fushatës së ministres Ogerta Manastirliu, e cila ishte propozuar si kandidate e mundshme për Bashkinë e Tiranës.

Takimi u zhvillua pak ditë pas vendimit të Gjykatës Kushtetuese, e cila ndryshoi ecurinë e ngjarjeve politike duke rikthyer në detyrë kryetarin aktual të bashkisë, Erion Veliajn. Kjo nënkupton se për momentin nuk pritet të zhvillohen zgjedhje të reja për drejtimin e Bashkisë së Tiranës.