Mbytja e 15-vjeçarit, pranga burrit të nënkryetares së Bashkisë Gjirokastër

Policia e Gjirokastrës ka vënë në pranga Ermal Kokon, pronarin e kompleksit të pishinave “Glow”, në kuadër të hetimeve që po zhvillohen për ngjarjen tragjike ku humbi jetën një 15-vjeçar.

Arrestimi është kryer pas veprimeve të para hetimore që synojnë të zbardhin plotësisht rrethanat dhe përgjegjësitë që lidhen me vdekjen e të miturit në ambientet e kompleksit.

Sipas burimeve nga grupi hetimor, ndaj Ermal Kokos rëndon dyshimi për veprën penale “Shkelja e rregullave të mbrojtjes në punë”. Prokuroria po shqyrton nëse subjekti kishte respektuar të gjitha standardet e sigurisë të kërkuara me ligj, si dhe nëse ishin marrë masat e nevojshme për ndërhyrje të menjëhershme në situata emergjente.

Hetuesit po verifikojnë dokumentacionin dhe kushtet e funksionimit të kompleksit për të përcaktuar nëse ka pasur mangësi në zbatimin e protokolleve të sigurisë që duhet të garantohen në ambiente të tilla.

Ermal Koko është bashkëshorti i Artiste Kokos, nënkryetare e Bashkisë Gjirokastër. Ndërkohë, hetimet vazhdojnë me intensitet për të sqaruar çdo detaj të ngjarjes dhe për të përcaktuar përgjegjësitë ligjore që mund të lidhen me rastin.