Mediat amerikane: Neza ishte informator konfidencial i FBI, McGonigal rrezikon dekada burg

Ish-zyrtari i lartë i FBI, Charles McGonigal, doli dje përpara gjykatës në lidhje me dosjen që e akuzon atë se ka marrë 225 mijë dollarë nga një ish-agjent sekret shqiptar.

Për dosjen tjetër, që lidhet me oligarkun rus, Oleg Deripaska, ai kishte dalë përpara gjykatës dy ditë më parë.

Mediat amerikane e kanë lajm kryesor seancën e mbrëmshme.

Sipas gazetës së madhe ‘USA Today’, 54-vjeçari McGonigal e deklaroi veten të pafajshëm.

Gazeta shkruan se McGonigal ka pasur në dorë disa prej informacioneve më të ndjeshme të inteligjencës amerikane.

‘USA Today’ thekson se pikërisht Agron Neza, i etiketuar si Personi A në dosjen hetimore, ka qenë informatori i FBI për këtë rast.

Edhe Zëri i Amerikës në versionin anglisht shkruan se Neza ‘ishte informatori konfidencial për hetimin’.

VOA në anglisht raporton se McGonigal rrezikon disa dekada burg vetëm për dosjen e ryshfetit shqiptar. Së bashku edhe me dosjen tjetër, atë për korruptimin nga një oligark rus, McGonigal mund të dënohet deri me 80 vite burg.

VOA shkruan se McGonigal u pagua që të hetojë një lobist amerikan që po punonte për partinë kryesore opozitare shqiptare.

“Marrëdhëniet sekrete të McGonigal me Ramën dhe roli i tij në hetimin e lobistit të partisë opozitare janë shndërruar në një skandal të madh kombëtar në Shqipëri,” raporton VOA në anglisht.