“Në 2011 donte të jepte dorëheqjen”

Kreu i Partisë së Lirisë, Ilir Meta, ka vendosur të ofrohet si dëshmitar në procesin për ngjarjet e 21 Janarit, duke pretenduar se disponon informacione të rëndësishme që nuk janë bërë publike.

I pyetur nga mediat mbi këtë vendim, kryetari i Partisë Demokratike, Sali Berisha, tha se është e mundur që Meta të ketë të dhëna të vlefshme, pasi në atë kohë mbante postin e zëvendëskryeministrit.

Berisha shtoi se Meta i kishte shkuar në zyrë dhe i kishte komunikuar se do të jepte dorëheqjen, pasi nuk dëshironte të shkonte në prokurori në statusin e një zyrtari të lartë.

“Është e njohur se Edi Rama për të organizuar ngjarjet e 21 Janarit manipuloi dhe falsifikoi një regjistrim të madh nga i ndjeri Dritan Prifti, ku pretendonte se Meta ishte paguar 700 mijë euro nga një biznesmen që kërkonte të drejtën e tij. Unë, si kryeministër, e dëgjova Priftin dhe i thashë të nxirrte regjistrimin menjëherë sapo të dilte nga dera e zyrës sime. Pushteti nuk më merret mua nga askush”, tha Berisha.

Ai shtoi se kishte një shkresë të firmosur nga pronari i një kompanie që kishte fituar me gjyq të drejtën e koncesionit të një hidrocentrali, por nga moszbatimi i vendimit kompania humbi 70 mijë euro. Meta i kishte thënë Priftit se vendimi i gjykatës duhej zbatuar, pasi dëmi i shkaktuar ishte rreth 700 mijë euro. Berisha përfundoi duke treguar se Meta në atë kohë i kishte kërkuar dorëheqjen, duke mos pranuar të shkonte në prokurori si zëvendëskryeministër.