Meta: 5 ambasada më kërcënuan për Marsida Xhaferllarin, donin Arta Vorpsin në Kushtetuese

Ish-Presidenti i Republikës, Ilir Meta, ka bërë deklarata të forta gjatë seancës gjyqësore të kësaj të enjteje, duke pretenduar se gjatë ushtrimit të detyrës është kërcënuar nga përfaqësues të pesë ambasadave të huaja për çështjen e emërimit të anëtarëve të Gjykatës Kushtetuese.

Sipas Metës, presioni ndaj tij kishte si qëllim pengimin e emërimit të Marsida Xhaferllarit në Gjykatën Kushtetuese dhe favorizimin e Arta Vorpsit për këtë pozicion.

Ish-kreu i shtetit pretendoi se përfaqësuesit diplomatikë kishin ndërhyrë drejtpërdrejt në një proces që, sipas tij, duhej të ishte pjesë e kompetencave institucionale të Presidentit të Republikës.

“Jam kërcënuar si President i Republikës nga 5 fëlliqësira ambasadash, që përfaqësonin 5 ambasada të huaja, që të mos ishte Marsida Xhaferllari në Kushtetuese, por të ishte ajo e Lanës, Arta Vorpsi”, deklaroi Meta.

Gjatë së njëjtës seancë, ai hodhi akuza edhe ndaj Prokurorisë së Posaçme, duke pretenduar se hetimet dhe akuzat ndaj tij janë ndikuar nga ish-zyrtari i FBI-së, Charles McGonigal, dhe ish-ambasadorja amerikane në Tiranë, Yuri Kim.

Meta e cilësoi këtë ndikim si një ndërhyrje të papranueshme dhe përdori tone të ashpra ndaj ish-diplomates amerikane, duke pretenduar se ajo ka vepruar kundër interesave të Shqipërisë.

“Prokuroria ka bërë veç shkelje e ndikuar nga Charles McGonigal dhe Yuri Kim, armike e përbetuar e Shqipërisë, në shërbim të Serbisë”, u shpreh ish-Presidenti.

Një tjetër çështje ku Meta u ndal ishte ajo e lobimit në Shtetet e Bashkuara të Amerikës. Ai deklaroi se nuk ka asgjë për të fshehur dhe se është i gatshëm të udhëtojë drejt SHBA-së me shpenzimet e tij, nëse autoritetet amerikane kanë pretendime për ndonjë shkelje nga ana e tij.

Ish-kreu i shtetit këmbënguli se veprimet e kryera në kuadër të kësaj çështjeje janë të dokumentuara dhe të verifikueshme, duke pretenduar se çdo veprim është realizuar përmes bashkëshortes së tij dhe se kontrata përkatëse përmban të gjitha detajet.

“Ajo gjykatë nuk e di që unë iki që sot me shpenzimet e mia në SHBA, nëse ata kanë gjë me mua. Në SHBA edhe Maduron e arrestuan me mandat-arresti! Ka të bëjë seriozisht me marrëdhëniet shqiptaro-amerikane. Çdo veprim e kam bërë përmes zonjës. Kontrata është aq e specifikuar, çdo gjë e verifikueshme”, deklaroi Meta.

Deklaratat e ish-Presidentit rikthyen në vëmendje përplasjet e tij me përfaqësuesit ndërkombëtarë lidhur me procesin e përzgjedhjes së anëtarëve të Gjykatës Kushtetuese, ndërsa pretendimet për kërcënime diplomatike dhe ndikim në hetimet ndaj tij mbeten deklarime të Metës, të cilat kërkojnë verifikim të pavarur.