Mjekët e infermierët po ikin në Gjermani, në qendrat mjekësore rritet numri i vizitave

Shqipëria vijon ende të përballet me humbje të personelit mjekësor, pasi mjekët dhe infermierët çdo ditë e më shumë i kanë sytë për jashtë vendit. Fenomeni largimit të këtyre profesionistëve është masivizuar veçanërisht në dekadën e fundit. Mungesa e mjekëve specialistë, viteve të fundit, ndihet në shumë qendra spitalore të vendit.

INSTAT raportoi se numri i infermierëve në këtë shërbim ka një rënie me 0,7 %, ndërkohë edhe numri i mjekëve krahasuar me një vit më parë ka një tkurrje me 1,9 %. INSTAT raportoi se në shërbimin parësor vitin e kaluar ishin vetëm 1777 mjekë, ose 35 më pak se me 2021, ndërsa numri i infermierëve ra në 6792 ose 50 më pak se vitit 2021.

Shumë mjekë e infermierë po zgjedhin Gjermaninë si vendin ku duan të ushtrojnë profesionin e tyre, duke e lënë Shqipërinë me pak ‘bluza të bardha’. Numri i vizitave ka pësuar një rritje me 1,0 %, krahasuar me një vit më parë. E ndërsa rritet numri i mjekëve që ikin, është rritur edhe numri i vizitave në qendrat shëndetësore.

Mjekët që janë të punësuar jashtë vendit janë sa 22% e atyre brenda vendit. Në të dhënat e fundit, tregohet se numri i studentëve në arsimin e lartë ka pësuar rënie me rreth 13% nga 2019 – 2023, por në degët ku mund të gjesh punë në emigracion ka rritje. Shpesh herë është dhënë alarmi se nëse bluzat e bardha vazhdojnë të largohen me këto ritme nga Shqipëria, vendi rrezikon të pa mjekë dhe infermierë, por shteti ende nuk po merr masa.