Murrizi nxjerr prapaskenat e Ramës: Ministrat kanë frikë, drejtorët i merr vetë në telefon

Myslym Murrizi ka hedhur akuza ndaj mënyrës se si kryeministri Edi Rama drejton administratën shtetërore, duke pretenduar se vendimmarrja në qeveri është përqendruar te zyra e kryeministrit, ndërsa ministrat kanë humbur rolin e tyre dhe shmangin marrjen e përgjegjësive.

I ftuar në një emision televiziv, Murrizi deklaroi se Rama nuk pret që ministrat të komunikojnë me drejtuesit e institucioneve që varen prej tyre, por ndërhyn vetë përmes telefonatave të drejtpërdrejta me drejtorët e përgjithshëm.

“Rama qeveris me urdhër drejtpërdrejt me drejtorë. Rama merr 30 drejtorë të përgjithshëm, i merr vetë në telefon”, u shpreh Murrizi.

Sipas tij, kjo mënyrë drejtimi ka krijuar një situatë ku ministrat nuk marrin përsipër firmosjen e dokumenteve zyrtare, duke ia kaluar këtë përgjegjësi zëvendësministrave.

“Ministrat sa shkojnë në zyrë ia delegojnë që të firmosin zëvendëset se kanë frikë”, deklaroi ai.

Murrizi kritikoi gjithashtu mënyrën se si Rama ndërton raportet me administratën dhe përzgjedh njerëzit që vendos në drejtimin e institucioneve. Ai përdori një gjuhë të ashpër për të përshkruar stilin e qeverisjes së kryeministrit, duke pretenduar se në poste të rëndësishme ngrihen persona që nuk përfaqësojnë standardet e duhura.

“Rama këtë stilin e dardhave pas shpine e ka kollaj ta shesë. Ai qeveris duke ngritur në piedestal pjesën më të pistë”, u shpreh ish-deputeti.

Deklaratat e Murrizit rikthejnë në vëmendje debatin mbi përqendrimin e pushtetit ekzekutiv, rolin real të ministrave dhe pavarësinë e drejtuesve të administratës publike.

Pretendimet e tij vendosin në pikëpyetje se kush e merr realisht vendimin në institucionet shtetërore: ministrat që mbajnë përgjegjësi politike për sektorët që drejtojnë apo kryeministri përmes komunikimeve të drejtpërdrejta me drejtuesit e administratës.