Sulmohet me levë një dyqan në Tiranë

Kompania celulare One Albania vijon të përballet me akuza dhe pakënaqësi në rritje nga qytetarët, duke u kthyer, sipas denoncimeve të shumta, në një problem serioz për konsumatorët në vend.

Së fundmi, një incident i rëndë është raportuar në Tiranë, ku një person ka sulmuar me levë një nga dyqanet e kompanisë, duke thyer xhamat e objektit. Edhe pse nuk ka ende një reagim zyrtar mbi ngjarjen, dyshohet se ajo lidhet me pakënaqësitë e akumuluara ndaj shërbimeve dhe praktikave të kompanisë.

Ky nuk është një rast i izoluar. Pak kohë më parë, në Kukës, një 49-vjeçar tentoi t’i vinte flakën një tjetër dyqani të kësaj kompanie. Sipas të dhënave zyrtare, ai kishte hyrë në ambientet e subjektit me benzinë dhe kishte kërkuar që të pranishmit të largoheshin, duke rrezikuar një ngjarje edhe më të rëndë.

Ndërkohë, ankesat ndaj kompanisë janë të shumta dhe lidhen kryesisht me cilësinë e shërbimit, ndërprerjet e vazhdueshme, si dhe mënyrën e lidhjes së kontratave. Shumë qytetarë pretendojnë se janë përballur me vështirësi në marrjen e shërbimeve apo janë ndjerë të detyruar të pranojnë kushte të pafavorshme kontraktuale.

Një tjetër shqetësim i ngritur shpesh është edhe rritja e tarifave, si dhe pengesat për ndërrimin e operatorit, çka ka sjellë reagime të shumta në rrjetet sociale dhe media.

Ndërsa situata vijon të tensionohet, ekspertët theksojnë nevojën për më shumë transparencë dhe mbikëqyrje institucionale, në mënyrë që të mbrohen të drejtat e konsumatorëve dhe të shmangen përshkallëzime të mëtejshme të incidenteve.