Nga Dhermiu me dashuri edhe për Sebastianin

Klodian Tomorri

Ndërsa Shqipëria shkrumbohet, në vilën qeveritare të Dhërmiut hyjnë e dalin këstexhinjtë. Sot i erdhi radha Sebastian Kurzit, ish-kryeministrit të Austrisë.

Pasi i thuri lavde të mëdha Edi Ramës pas fitores së zgjedhjeve të 11 majit, përmes një editoriali që u botua vetëm në Facebook-un e tij dhe në ndonjë media qeveritare shqiptare, sot Kurzi mbërriti në Dhërmi, i shoqëruar me eskortë nga autoritetet shqiptare. Sepse vjen gjithmonë dita e honorareve.

Aktualisht Kurz nuk mban asnjë detyrë shtetërore që të justifikojë shoqërimin protokollar me eskortë. Përkundrazi, në Austri ai është politikisht i diskredituar dhe juridikisht me njollë penale. Kurz u rrëzua nga Parlamenti austriak pasi ministrat e tij u filmuan duke marrë para nga oligarkë rusë. Më vonë, ai u dënua nga Gjykata e Vjenës për dëshmi të rreme në shkallë të parë, por u shpëtua në apel.

Sot ai thotë se punon si konsulent për disa kompani të mëdha ndërkombëtare, mes tyre fondi Mubadala dhe kompania shtetërore e naftës në Abu Dhabi. Herë pas here bën edhe ndonjë xhiro në Dhërmi. Dhe ky nuk është i vetmi. Aty vjen Toni, vjen ai i Kroacisë, vijnë edhe sheikë.

Kështu që axhenda e pushimeve është e ngjeshur. Në pushimet e vogla mes pritje-përcjelljeve, gjen kohë edhe për ndonjë status rreth debatit që kanë hapur “lehaqentë” pse Shqipëria nuk blen avionë për fikjen e zjarreve. Por “lehaqentë” nuk e dinë se duhen bërë disa llogari: dy avionë për fikjen e zjarreve i hëngri vila e Dajtit, plot 6.5 milionë euro. Dy të tjerë kjo e Dhërmiut. Tani kemi rikonstruktuar edhe një tek Pallati i Brigadave, 5 milionë euro. Pa llogaritur Vlorën, Kavalishencën e të tjera.

Ndërkohë, nga Dhërmiu ku pret e përcjell këstexhinjtë, qeveria është “në ballë të punës” për menaxhimin e situatës së zjarreve. Lehaqentë le të vazhdojnë. Këstet nuk mbarojnë. Por të paktën këta austriakët mund t’i sistemonin te çunat e inceneratorëve, që të mos na binte shumë rëndë. Se nuk mbarohen.

Ah, kjo vilë e Dhërmiut ka edhe një veçanti: ajo është ndarë gjithmonë mes Presidentit dhe Kryeministrit. Por Bajramit nuk i ka rënë rasti të bëjë asnjë ditë pushim aty. Nuk e do vetë, more, jo se nuk e lënë.