Pas transferimit në Arabinë Saudite del në skenë Olsi Rama

Kapiteni i Kombëtares shqiptare, Berat Gjimshiti, i ka dhënë fund aventurës së tij në Bergamo pas një periudhe të gjatë me Atalantën dhe tashmë është zyrtarisht pjesë e klubit saudit Al Diriyah. Transferimi u konfirmua nga vetë klubi më 10 gusht. 

Por në këtë lëvizje bie në sy edhe një emër shqiptar: Olsi Rama, vëllai i kryeministrit Edi Rama.

Në një postim në rrjetet sociale, Rama ka bërë të ditur se ka qenë pjesë e procesit që çoi në transferimin e kapitenit kuqezi drejt Arabisë Saudite, duke shkruar: “I lumtur që isha pjesë e kalimit të kapitenit të kombëtares sonë nga Atalanta BC tek Diriyah Club në Saudi Pro League.”

Olsi Rama falënderon gjithashtu personat e tjerë që, sipas tij, kontribuuan në realizimin e transferimit dhe i uron sukses Gjimshitit në aventurën e re.

Gjimshiti, i cili ishte pjesë e Atalantës prej vitit 2016 dhe u shndërrua në një prej liderëve të skuadrës, largohet pas një periudhe të rëndësishme në karrierën e tij. Me klubin bergamask ai ishte pjesë e triumfit historik në Europa League në sezonin 2023-2024.

Atalanta pritet të përfitojë rreth 3 milionë euro nga transferimi, ndërsa raportimet për kontratën e Gjimshitit në Arabinë Saudite kanë folur për një marrëveshje me kushte financiare shumë të favorshme. 

Detaji që tërheq vëmendjen: ndërsa Gjimshiti nis kapitullin e ri në Saudi Pro League, Olsi Rama shfaqet publikisht si një prej personave që morën pjesë në realizimin e transferimit të kapitenit të Kombëtares shqiptare.