Pacolli: Po mbahet peng investimi 100 mln € në Aeroportin e Vlorës

ërplasja rreth Aeroportit të Vlorës ka hyrë në një fazë të re dhe më të tensionuar, pasi biznesmeni Behgjet Pacolli ka reaguar publikisht, duke ngritur shqetësime serioze mbi mënyrën si po trajtohet një nga projektet më të rëndësishme infrastrukturore në vend.

Në deklaratën e tij, Pacolli thekson se kompania që ai përfaqëson, MABCO, po përballet me një situatë që sipas tij përbën shkelje të rëndë të sigurisë juridike dhe të drejtave të investitorëve. Ai hedh akuza të drejtpërdrejta ndaj institucioneve shtetërore dhe segmenteve të sistemit të drejtësisë, duke pretenduar se po lejohet bllokimi i një investimi strategjik pa bazë të qartë ligjore.

Reagimi vjen pas ultimatumit 30-ditor të Ministrisë së Infrastrukturës drejtuar ortakëve të koncesionit, për të zgjidhur mosmarrëveshjet dhe për të përshpejtuar përfundimin e punimeve. Megjithatë, Pacolli kundërshton narrativën zyrtare që e paraqet situatën si një konflikt të thjeshtë mes ortakësh, duke argumentuar se problemi është shumë më i thellë dhe lidhet drejtpërdrejt me klimën e investimeve në Shqipëri.

Sipas tij, prej disa javësh asetet kryesore të aeroportit, përfshirë ndërtesat dhe terminalin, të cilat përfaqësojnë një investim mbi 100 milionë euro, janë mbajtur të bllokuara pa një vendim gjyqësor përfundimtar. Ai shton se edhe garancitë financiare që kapin vlerën e mbi 210 milionë eurove janë prekur nga kjo situatë.

Pacolli e cilëson këtë zhvillim si një goditje të drejtpërdrejtë ndaj pronës private dhe shtetit të së drejtës, duke theksuar se veprime të tilla krijojnë pasiguri të thellë për investitorët vendas dhe të huaj. Në të njëjtën linjë, ai shpreh shqetësim edhe për rolin e drejtësisë, duke përmendur vendimmarrje që sipas tij bien ndesh me precedentët e vendosur nga Gjykata e Lartë.

Sipas biznesmenit, kjo çështje është shqyrtuar më parë nga instanca më e lartë gjyqësore, e cila ka mbështetur qëndrimin e kompanisë, por vendimet e saj, sipas tij, nuk po respektohen në praktikë. Ai paralajmëron se një situatë e tillë minon besimin tek ligji dhe institucionet.

Në reagimin e tij, Pacolli ngre pikëpyetje të forta mbi funksionimin e shtetit ligjor, duke vënë në dyshim efektivitetin e sistemit gjyqësor dhe garancitë që u ofrohen investitorëve në vend. Ai thekson se mungesa e zbatimit të ligjit dhe vendimeve gjyqësore krijon një precedent të rrezikshëm për ekonominë.

Në përfundim, ai e konsideron këtë situatë si një alarm për klimën e biznesit në Shqipëri, duke theksuar se çështja e Aeroportit të Vlorës tejkalon një konflikt të zakonshëm dhe prek drejtpërdrejt besueshmërinë e shtetit ndaj investimeve strategjike.

Ndërkohë, autoritetet shqiptare kanë shtuar përpjekjet për të gjetur një zgjidhje të shpejtë, në një kohë kur debati po zhvendoset nga një çështje teknike në një diskutim më të gjerë mbi sigurinë juridike dhe standardet e funksionimit të shtetit.

Reagimi i plotë:

Vazhdojmë betejën tonë për Aeroportin e Vlorës. Dhe këtë betejë nuk do ta ndalim.

Prej gati një muaji, ndërtesat, terminali dhe asetet ku janë investuar mbi 100 milionë euro, së bashku me kolateralet financiare me vlerë mbi 210 milionë euro, mbahen të bllokuara në mënyrë të papranueshme nga grupe të caktuara, me mbështetjen e Policisë së Shtetit, pa asnjë vendim gjyqësor.

Kjo nuk është thjesht një çështje procedurale. Kjo është një goditje e rëndë ndaj pronës private, investimit dhe ndaj sigurisë juridike dhe ndaj vetë shtetit të së drejtës.

Ajo që e bën edhe më skandaloze këtë situatë është fakti se veprime të tentohen të mbulohen edhe përmes vendimeve gjyqësore të dyshimta, si në rastin e gjyqtares së Shkallës së Parë të Tiranës, znj. Miranda Nakaj, e cila ka nxjerrë vendime që bien hapur ndesh me ligjin dhe me vendimmarrjen e Gjykatës së Lartë.

Këto çështje nuk janë të reja. Ato janë shqyrtuar më parë nga Gjykata e Lartë, e cila i ka dhënë të drejtë të plotë kompanisë Mabco. Megjithatë, sot po veprohet sikur ligji nuk ekziston, sikur vendimet e Gjykatës së Lartë nuk kanë asnjë vlerë dhe sikur prona private mund të merret peng nga kushdo që ka forcë, lidhje apo mbështetje institucionale.

Pyetja është e thjeshtë dhe duhet t’i trondisë të gjithë:

Ku kemi arritur, o Zot?

Në çfarë gjendjeje është katandisur siguria juridike në Shqipëri?

Çfarë vlere ka ligji, kur nuk zbatohet?

Çfarë vlere ka Gjykata e Lartë, kur vendimet e saj sfidohen?

Çfarë garancie ka një investitor, kur mbi qindra miliona euro mund të bllokohen pa një vendim përfundimtar gjyqësor?

Kjo nuk është Shqipëria demokratike që pretendojmë të ndërtojmë.

Kjo është një alarm i madh për drejtësinë, për ekonominë dhe për çdo qytetar që beson ende se ligji duhet të qëndrojë mbi forcën.

Ne nuk do të heshtim. Nuk do të tërhiqemi. Dhe nuk do të lejojmë që Aeroporti i Vlorës të mbahet peng nga paligjshmëria.

Pacolli: Po mbahet peng investimi 100 mln euro në Aeroportin e Vlorës

Zëri yt bëhet lajm.

Më shumë nga Lajme

Zëri yt bëhet lajm.