Trondit Valon Ademi: Ju tregoj kush qëndron pas Pacollit në Aeroportin e Vlorës

Valon Ademi reagon pas vendimit të QKB-së për regjistrimin e aksioneve në Aeroportin e Vlorës dhe kërkon hetim nga SPAK për konfliktin me Behgjet Pacollin.

Reagimi i aksionerit Valon Ademi pas zhvillimeve të fundit në regjistrimin e aksioneve të Aeroportit të Vlorës ka rikthyer në vëmendje konfliktin për pronësinë e projektit. Ademi kundërshton interpretimin se vendimi i Qendrës Kombëtare të Biznesit (QKB) i ka rikthyer Behgjet Pacollit kuotat e shitura dhe paralajmëron se do ta kundërshtojë ligjërisht ndryshimin e regjistrit.

Përmes një postimi në rrjetet sociale, ai pretendon se kompania 2A Group vazhdon të zotërojë 49% të kuotave të VIA-s, duke argumentuar se të drejtat e saj burojnë nga një kontratë noteriale. Sipas Ademit, ndryshimi i të dhënave në ekstraktin e QKB-së nuk është i njëjtë me anulimin e kontratës së shitblerjes.

Por deklarata përmban edhe një pretendim të fortë lidhur me interesat që, sipas tij, qëndrojnë pas projektit të aeroportit. Ademi përmend Timur Kulibajevin, dhëndrin e ish-presidentit të Kazakistanit, Nursulltan Nazarbajev, duke pretenduar se ai është i lidhur me interesat që qëndrojnë pas Behgjet Pacollit në këtë projekt.

Ky pretendim është pjesë e deklaratës së Ademit dhe kërkon verifikim të pavarur.

Aksioneri kërkon ndërhyrjen e Prokurorisë së Tiranës dhe SPAK-ut, brenda kompetencave përkatëse, për të hetuar dokumentacionin dhe për të përcaktuar përgjegjësitë në konfliktin mes palëve. Ai thotë se kompania e tij ka depozituar kallëzime ndaj MABCO-s dhe Behgjet Pacollit, veprimet e të cilëve i konsideron të kundërligjshme.

Në reagim, Ademi kërkon që hetimet të sqarojnë nëse ka pasur mashtrim dhe kush mban përgjegjësi, duke theksuar se përplasja nuk mund të zgjidhet përmes deklaratave publike.

Në fund, ai këmbëngul se 2A Group do t’i mbrojë pretendimet e saj përmes rrugëve ligjore dhe kundërshton mundësinë që Aeroporti i Vlorës të përfundojë nën pronësinë e Compartment Berninas apo Timur Kulibajevit.

Përplasja për aksionet dhe pronësinë e projektit mbetet në pritje të sqarimit institucional dhe të një vendimmarrjeje që të përcaktojë statusin juridik të kuotave dhe përgjegjësitë e secilës palë.

Postimi i plotë i Ademit

Pronësia nuk kthehet me tituj lajmesh

2A GROUP KA QENË, ËSHTË DHE MBETET ORTAKE ME 49% NË AEROPORTIN E VLORËS.
Për mediat që po raportojnë se “QKB anulon transferimin e kuotave” dhe “i kthen Behgjet Pacollit 98% të pronësisë”, na duhet të sqarojmë se QKB ka ndryshuar ekstraktin. Nuk ka anuluar kontratën e shitblerjes së kuotave. Këto janë dy gjëra të ndryshme. Ndryshimi i të dhënave në regjistër nuk ia rikthen shitësit kuotat që ka shitur, pavarësisht se si paraqitet kjo në titujt e lajmeve.

2A Group e konsideron të kundërligjshëm vendimin e titullarit të QKB-së për heqjen nga ekstrakti të raportit të kuotave që buron nga kontrata noteriale e datës dhe do ta kundërshtojë me të gjitha mjetet ligjore.

Ligji është i qartë. Neni 690 i Kodit Civil përcakton se kontrata e lidhur rregullisht ka forcën e ligjit për palët dhe nuk ekziston asnjë vendim gjyqësor që ta ketë shpallur të pavlefshme apo të ketë vendosur zgjidhjen e saj. Neni 74, pika 2, i ligjit “Për tregtarët dhe shoqëritë tregtare” përcakton se regjistrimi i kalimit të kuotave ka efekt deklarativ.

Pra, të drejtat tona mbi kuotat burojnë nga kontrata. QKB-ja nuk mund ta zhbëjë shitblerjen duke ndryshuar të dhënat në ekstrakt. Një vendim mbi regjistrimin nuk është vendim gjyqësor mbi vlefshmërinë e kontratës dhe nuk ia rikthen shitësit kuotat që ka shitur.
Kjo është e vërteta dhe këtë duhet ta dijë opinioni publik: 2A Group vazhdon të zotërojë 49% të kuotave të VIA-s në bazë të kontratës noteriale dhe në bazë të ligjit “Për tregtarët dhe shoqëritë tregtare”.

Kemi qenë të parët që kemi kallëzuar në organet kompetente veprimet e MABCO-s dhe Behgjet Pacollit, të cilat i konsiderojmë mashtruese. Dhe jemi ne që kemi kërkuar që këto kallëzime të hetohen sa më shpejt.

Opinioni publik duhet ta dijë sa më shpejt nëse, Valon Ademi, e ka mashtruar Behgjet Pacollin apo ka ndodhur e kundërta.

Prandaj, i kërkojmë Prokurorisë së Tiranës dhe SPAK-ut, brenda kompetencave të tyre, të veprojnë sa më shpejt. Të hetojnë, të ballafaqojnë provat dhe të kërkojnë përgjegjësi nga kushdo që provohet se ka shkelur ligjin.

Për ne, gjërat janë të qarta. Nëse në Shqipëri ka drejtësi, duhet të përcaktohet sa më shpejt kush mban përgjegjësi: Valon Ademi apo Behgjet Pacolli. Të dyja versionet nuk mund të jenë të vërteta dhe kjo përballje nuk mund të mbetet pafund nëpër tituj lajmesh e as ne facebook.

Garantojmë opinionin publik se, pavarësisht propagandës, qëndrimi ynë është i palëkundur:

Aeroporti i Vlorës nuk do të bëhet kurrë pronë e Compartment Berninas e as e Timur Kulibajev-it, dhe për këtë do të qëndrojmë me të gjitha mjetet ligjore dhe jo vetëm.