Përgjimet/ Pacienti keq pas operimit në privat, mjeku “kasap” i QSUT!: Vari leshtë!

Emiljano Lela, koordinatori në Spitalin e Onkologjikut, i shihte pacientët pa mëshirë, si raste të arta për të përfituar para. Sapo konstatonte në spital qytetarë në hall në pritje të trajtimit për sëmundjet tumorale, i afrohej, i kërkonte të braktisin mjekun që kishin rekomandimin për vizitë dhe më tej i orientonte tek bashkëpunëtori i tij, Edmond Gashi, onkologu në QSUT me klinikë private te Astiri, “Megis”, me masë arresti shtëpiak.

Kështu futi në kurth edhe një qytetar në nevojë nga Burreli që priste në radhë jashtë spitalit me nënën e tij të sëmurë që sapo ishte diagnostifikuar me tumor në gji. Pasi i çoi te Edmond Gashi, mjeku, sipas dëshmive të cituara në dosjen e prokurorisë së Tiranës, i ka parë letrat e zonjës në mënyrë sipërfaqësore dhe në sytë e tyre e ka bërë gjendjen alarmante duke u thënë se duhej operacion i menjëhershëm, por se në shtet ka radhë dhe biopsinë do e bënte te klinika e tij. Pas një muaji koordinatori i Onkologjikut Emiljano Lela i ka telefonuar që nëna duhej të vinte për operacion te “Megis” dhe se pagesa ishte 3000 euro, por meqë i rekomandoi ai do përfitonin ulje, 2500 euro.

Nga komunikimet që prokuroria ka zbardhur mes Edmond Gashi dhe vartësve të tij në klinikë, kur lajmërohej se ndonjë nga pacientët kishte temperaturë, mjeku nuk shkonte pranë tyre, por i përgjigjej stafit me gjakftohtësi jo njerëzore ndaj një të sëmuri, duke i thënë “vari le****”.

Ndërkohë nga biseda mes dy personave, të cilët diskutojnë në lidhje me faktin që në spitalin shtetëror mashtrohet me radha fiktive, në mënyrë që pacientët të drejtohen për tek spitalet private.

Duket se shtetasja e identifikuar me emrin Silvana, bën edhe futjen pa radhë të pacientëve në raste ndërhyrjeje.

Pjesë nga dosja:

Në datën 30/11/2023 në orën 13:30 biseda ka qënë si më poshtë vijon:

Silvana: He moj Flutura si ke qënë?

Flutura: Vazhdon me përshëndetjet dhe i tregon për një pacient me kancer në gradën e dytë agresiv që ka nevojë urgjente për operim dhe është e lidhur me doktor Elidon Ninin.

Silvana: Me Elidonin nuk të ndihmojë dot nuk kam asnjë lloj kontakti. E vetmja ndihmë që mund të të jap është ta operojë Mondi im tek kirurgjia se i qan, ta bëjmë pa radhë. Tek Onko me këdo doktor tjetër të fusja unë pa radhë që nesër, por me Elidonin nuk flas se është në rang kryeministri e lartë, spyet për të tjerë.

Flutura: Po na thanë ka shumë radhë, po dhe kësaj nga zyra do ja kenë sugjeruar.

Silvana: S’ka radhë fare por e gjitha është skemë për ta dërguar në privat se asnjë punë nuk kanë. I bëjnë të gjitha për t’i sorollatur që t’i dërgojnë në privat pacientët se e di unë shumë mirë.

Flutura: Pa të nxjerrë ti po e diskutoj njëherë me ta dhe flasim sërish.