Kamionët e Valon Ademit kanë bllokuar rrugën e fshatit, Policia s’reagon

Biznesmeni Behgjet Pacolli i është drejtuar me një letër publike Prokurorisë së rrethit të Vlorës, duke ngritur akuza të forta për bllokim të aksesit në Aeroportin e Vlorës dhe uzurpim të rrugëve publike.

Në reagimin e tij, Pacolli thekson se ish-ortaku i tij, Valon Ademi, ka ndërmarrë veprime që sipas tij pengojnë jo vetëm hyrjen në zonën e aeroportit, por edhe lëvizjen e lirë të banorëve të fshatit.

Ai e cilëson situatën si alarmante, duke theksuar se këto veprime po ndodhin në prani të Policisë së Shtetit, e cila sipas tij nuk po ndërhyn për të rikthyer ligjshmërinë.

“Kamionët kanë bllokuar hyrjen dhe qasjen në arealin e aeroportit, ndërsa është uzurpuar edhe rruga publike e fshatit, duke penguar lëvizjen e qytetarëve,” shprehet Pacolli në letrën e tij.

Sipas tij, fakti që kjo situatë vijon pa ndërhyrje përbën një precedent të rrezikshëm për funksionimin e shtetit të së drejtës, duke ngritur pikëpyetje mbi rolin e institucioneve përgjegjëse.

Pacolli i bën thirrje Prokurorisë që të veprojë në përputhje me ligjin dhe të japë një përgjigje të qartë për situatën e krijuar, duke theksuar se pala që ai përfaqëson ka zgjedhur rrugën ligjore dhe jo përshkallëzimin e konfliktit.

Ai paralajmëron se mungesa e reagimit institucional mund të çojë në pasoja më të rënda, duke kërkuar ndërhyrje të menjëhershme për të rikthyer normalitetin dhe respektimin e ligjit.

“Ne kemi besuar te drejtësia. Nëse ligji nuk vepron, atëherë institucionet duhet të sqarojnë publikisht se si duhet të veprohet në një situatë të tillë,” përfundon ai.