Plagosje me thikë në Sarandë 26-vjeçarin, në kërkim autori

Policia e Sarandës ka shpallur në kërkim një 37-vjeçar, i identifikuar si Edmond Abazi, i njohur ndryshe me nofkën “Monçja”, pas një ngjarjeje të rëndë të ndodhur dy ditë më parë në zonën e quajtur “Plazhi i Ri”.

Sipas të dhënave paraprake, Abazi dyshohet se ka qëlluar me thikë një 26-vjeçar, Enkel Dano, duke i shkaktuar plagë në pjesën e poshtme të shpinës. I riu është transportuar menjëherë për ndihmë mjekësore dhe aktualisht ndodhet jashtë rrezikut për jetën.

Nga verifikimet e kryera, rezulton se i shpalluri në kërkim ka një të kaluar të ngarkuar kriminale, duke qenë më herët i përfshirë në vepra të ndryshme penale, si plagosje e rëndë me dashje, armëmbajtje pa leje, vjedhje, dëmtim prone, drejtim i parregullt i mjetit, dhunë në familje, kundërshtim për shkak të detyrës si dhe largim nga vendi i vuajtjes së dënimit.

Ndërkohë, edhe i plagosuri Enkel Dano rezulton me precedentë penalë, kryesisht në fushën e narkotikëve, për prodhim dhe shpërndarje të lëndëve të ndaluara.

Forcat e policisë vijojnë kontrollet për kapjen e autorit të dyshuar dhe zbardhjen e plotë të rrethanave të kësaj ngjarjeje.