Plani i emergjencës! Kërcënimi rus, Gjermania mobilizon ushtrinë

Forcat e armatosura gjermane po hartojnë një plan emergjence tronditës: në rast të një konflikti të madh mes NATO-s dhe Rusisë, spitalet ushtarake duhet të jenë gati të trajtojnë deri në 1,000 të plagosur çdo ditë.

Kjo masë pasqyron frikën në rritje të një përshkallëzimi të mundshëm, me paralajmërimet e NATO-s se Moska mund të nisë një sulm të gjerë deri në vitin 2029.

Pavarësisht se Kremlini mohon çdo përgatitje për luftë me Perëndimin, shkeljet e hapësirës ajrore nga avionë dhe dronë rusë mbi Poloni e Estoni kanë shtuar tensionet.

Kryemjeku i ushtrisë gjermane, Ralph Hoffman, tha se numri i të plagosurve do të varet nga intensiteti i luftimeve, por llogaritjet janë shqetësuese: “Realisht, po flasim për rreth 1,000 ushtarë të plagosur në ditë.” Ai shtoi se përvoja nga Ukraina ka treguar se natyra e luftës ka ndryshuar: sot plagët vijnë më shumë nga shpërthimet e dronëve dhe municioneve, sesa nga armët e zjarrit.

Që nga pushtimi rus i Ukrainës në vitin 2022, konflikti më i madh në Evropë pas Luftës së Dytë Botërore, ushtritë evropiane po forcojnë përgatitjet për një skenar lufte. Gjermania ka intensifikuar trajnimin mjekësor dhe planifikon të rrisë ndjeshëm kapacitetet e mbrojtjes civile.

Kreu i Zyrës Federale për Mbrojtjen Civile dhe Menaxhimin e Fatkeqësive, Ralf Tischler, ka paralajmëruar se iluzioni i së shkuarës, se lufta nuk mund të ndodhë më në Evropë, ka marrë fund. “Gjermania duhet të jetë e përgatitur për një luftë të mundshme agresive”, tha ai.

Autoritetet gjermane kanë paralajmëruar gjithashtu për një “mobilizim kombëtar”, me qëllim që tunelet, garazhet nëntokësore, stacionet e metrosë dhe bodrumet e ndërtesave publike të kthehen në strehimore për deri në 1 milion qytetarë në rast sulmi.