Policia merr në pyetje Adi Hilën pas skandalit me videot intime

Kompozitori Adrian Hila ndodhet në ambientet e Policisë së Tiranës, ku po merret në pyetje lidhur me videot me përmbajtje intime që janë publikuar dhe shpërndarë në platforma të ndryshme online.

Hila po jep deklarime përpara një grupi të posaçëm hetimor të Sektorit për Hetimin e Krimeve Kibernetike, i cili po punon për të zbardhur rrethanat e publikimit të materialeve dhe mënyrën se si ato kanë përfunduar në internet.

Në fokus të hetimit është identifikimi i burimit fillestar të videove, mënyra se si janë siguruar dhe personat që kanë pasur akses në to përpara se të bëheshin publike.

Hetuesit po verifikojnë gjithashtu gjurmët dhe të dhënat dixhitale që mund të ndihmojnë në identifikimin e personave të përfshirë në publikimin dhe shpërndarjen e materialeve.

Marrja në pyetje e kompozitorit është pjesë e veprimeve procedurale që po kryhen për dokumentimin e plotë të çështjes. Deri më tani, hetimi synon të përcaktojë se si janë siguruar pamjet, kush i ka publikuar fillimisht dhe nëse ka persona të tjerë të përfshirë në përhapjen e tyre.

Hetimet vijojnë për identifikimin e përgjegjësive të mundshme, ndërsa publikimi i materialeve intime ka ngritur edhe shqetësime për cenimin e privatësisë së personave të përfshirë.