POLICIA U PËRPLAS ME GRABITËSIT, NJË MBETI I VDEKUR NË VEND, NJË TJETËR U PLAGOS

Në lagjen 28 nëntori të qytetit, pati një përplasje me armë zjarri në orën 3:00 të mëngjesit të sotëm mes grabitësve dhe policisë. Për pasojë një nga grabitësit mbeti i vdekur në vend e një tjetër u plagos.

Dyshohet se autorët ishin katër por dy prej tyre janë larguar duke përfituar nga errësira. Mësohet se personat e maskuar kanë tentuar të vjedhin një banesë në shtëpinë e çiftit Muça. Ishte i zoti i shtëpisë, Minella Muça (pensionist) ai i cili njoftoi policinë sapo pikasi se grabitësit po tentonin të hapnin derën. Identitetet e plota të viktimës apo të të plagosurit nuk bëhen ende me dije ndërsa policia ka nisur menjëherë hetimet. Newsbomb.al mëson se çifti Minella, ka një djalë të ri i cili jetonte me ta. Megjithatë është ende shumë herët për të dalë në konkluzione për ngjarjen e rëndë.

NJOFTIMI I POLICISË:

Informacion paraprak

Në datën 23.03.2018, rreth orës 03:00, policia lokale u njoftua nga një telefonatë se në lagjen “29 Nëntori” Fier, pranë banesës së shtetasit M.M, disa persona kanë tentuar të hyjnë brenda shtepisë duke thyer drynin e derës.

Pas marrjes së njoftimit mbërritën në vendngjarje shërbimet e policisë, të cilët janë përballur me disa persona të maskuar e të armatosur me pistoleta e automatikë, të cilët kanë qëlluar me armë zjarri në drejtim të punonjësve të policisë.

Në kushtet e reagimit propocional, nga shkëmbimi i zjarrit, njëri nga autorët është plagosur dhe një tjetër ka gjetur vdekjen.

Të dy ata ishin të maskuar e të armatosur me pistoleta, të cilat u sekuestruan në cilësinë e provës materiale.

Autorët e tjerë, që dyshohet se janë edhe dy, duke qëlluar në drejtim të punonjësve të policisë janë larguar duke përfituar nga errësira dhe kushtet e motit, me një mjet ende të paidentifikuar.

Nga rradhët e Policisë së Shtetit nuk ka të lënduar.

Menjëherë janë ngritur pika të shumta kontrolli në të gjitha hyrje-daljet e qytetit dhe po vijon puna për kapjen e autorëve të tjerë.

Në vendin e ngjarjes janë sekuestruar një numër i konsiderueshëm provash materiale.

Nën drejtimin e një grupi të posacëm të Prokurorisë, i cili gjendet në vendngjarje, po vazhdon puna për dokumentimin e plotë të kësaj ngjarje.