Porositi vrasje për gjakmarrje, 34-vjeçari dënohet me 25 vite burg

Gjykata e Fierit ka dhënë një dënim prej 25 vitesh burg për 34-vjeçarin Laert Hasalla, i cili u shpall fajtor për porositjen e një vrasjeje të mbetur në tentativë, e motivuar nga gjakmarrja.

Hasalla, banues në fshatin Garunjas të Lushnjës, ndodhej më herët nën masën e sigurisë “arrest në shtëpi”, pasi akuzohej se kishte organizuar atentatin ndaj shtetasit me iniciale M.H., ngjarje e ndodhur në vitin 2023.

Sipas hetimeve të kryera nga Specialistët për Hetimin e Krimeve të Rënda në Drejtorinë Vendore të Policisë Fier, rezultoi se 34-vjeçari kishte paguar një person tjetër për të kryer vrasjen. Autori i atentatit, shtetasi M.M., 31 vjeç, tashmë i dënuar, ka qëlluar me armë zjarri në drejtim të një automjeti ku ndodhej objektivi i sulmit.

Nga të shtënat me armë, vrasja nuk u realizua, por si pasojë u plagos shtetasja B.S., e cila udhëtonte në të njëjtin mjet me M.H. Ajo u transportua për ndihmë mjekësore, ndërsa ngjarja u cilësua nga organet e drejtësisë si vepër penale e kryer në rrethana rënduese.

Pas vendimit të formës së prerë, policia ekzekutoi dënimin ndaj Hasallës, duke e dërguar atë në ambientet e vuajtjes së dënimit.