Presidenca zbardh detaje nga takimi i Këshillit të Sigurimit Kombëtar

Këshilli i Sigurimit Kombëtar u mblodh me thirrjen e Presidentit Bajram Begaj, ndërsa në qendër të diskutimeve ishte gjendja e institucioneve të sigurisë, bashkëpunimi ndërinstitucional dhe nevoja për forcimin e besimit të publikut.

Presidenti i Republikës, Bajram Begaj, thirri mbledhjen e Këshillit të Sigurimit Kombëtar, në një moment kur institucionet e sigurisë janë përballur me zhvillime dhe çështje që kanë tërhequr vëmendjen e opinionit publik.

Në mbledhje morën pjesë anëtarët e Këshillit të përcaktuar me ligj, ndërsa ishin të pranishëm edhe përfaqësues të Prokurorisë së Përgjithshme dhe Prokurorisë së Posaçme kundër Korrupsionit dhe Krimit të Organizuar, SPAK.

Diskutimet u përqendruan te mënyra se si institucionet e sigurisë duhet të koordinojnë veprimtarinë e tyre, të forcojnë bashkëpunimin me partnerët dhe aleatët ndërkombëtarë dhe të ruajnë besimin e qytetarëve te strukturat shtetërore.

Në sfondin e kësaj mbledhjeje qëndron edhe situata e krijuar në Shërbimin Informativ të Shtetit, pas hetimeve ku është përfshirë ish-drejtuesja e institucionit, Vlora Hyseni, e cila ndodhet në masën e sigurisë “arrest në shtëpi”.

Pas përfundimit të mbledhjes, Presidenca bëri të ditur disa nga përfundimet e Këshillit, duke vënë theksin te bashkëpunimi dhe funksionimi i koordinuar i institucioneve që kanë përgjegjësi në fushën e sigurisë kombëtare.

Sipas qëndrimit të përcjellë nga Presidenca, institucionet e sigurisë nuk duhet ta shohin njëra-tjetrën si rivale. Pavarësisht se kanë kompetenca dhe përgjegjësi të ndryshme, qëllimi i tyre është i përbashkët: mbrojtja e sigurisë së Republikës së Shqipërisë.

Në këtë kuadër, Këshilli ka kërkuar që mosbesimi mes institucioneve të mos zëvendësojë bashkëpunimin, por të ketë më shumë koordinim dhe komunikim profesional.

Një tjetër pikë e rëndësishme lidhet me hetimet e drejtësisë. Presidenca thekson se proceset hetimore duhet të zhvillohen në mënyrë të pavarur dhe se rezultatet e tyre duhet të respektohen nga të gjitha institucionet.

Po ashtu, sipas qëndrimit të bërë publik, çështjet që lidhen me individë të veçantë nuk duhet të shndërrohen në një krizë më të gjerë besimi ndaj shtetit dhe institucioneve të sigurisë.

Këshilli ka nënvizuar gjithashtu nevojën për forcimin e standardeve të kontrollit, transparencës dhe llogaridhënies, me qëllim që institucionet të dëshmojnë se janë në gjendje të korrigjojnë problematikat e brendshme dhe të mbrojnë interesin publik.

Në përfundim, Presidenca ka vlerësuar se Shqipëria disponon institucione, kapacitete profesionale dhe partnerë e aleatë ndërkombëtarë dhe se këto struktura duhet të veprojnë në koordinim për forcimin e shtetit dhe sigurisë kombëtare.

Këshilli i Sigurimit Kombëtar është organ këshillimor pranë Presidentit të Republikës. Ai nuk merr vendime, por e asiston Presidentin në ushtrimin e kompetencave të tij kushtetuese dhe ligjore. Mbledhjet e Këshillit zhvillohen me dyer të mbyllura.

NJOFTIMI:

Presidenti i Republikës, Sh. T. Z. Bajram Begaj, thirri sot mbledhjen e Këshillit të Sigurimit Kombëtar për të diskutuar çështjet e aktualitetit dhe impaktin që ato kanë mbi veprimtarinë e institucioneve të sigurisë.

Në mbledhje, përveç anëtarëve që përcakton ligji, ishin të ftuar edhe institucioni e Prokurorisë së Përgjithshme dhe SPAK-u.
Këshilli diskutoi për situatën dhe masat që duhet të merren nga institucionet për forcimin e bashkëpunimit ndërinstitucional, bashkëpunimin me partnerët dhe aleatët dhe forcimin e besimit të publikut.

Në takim u konkludua se:

Për sigurinë kombëtare, institucionet nuk konkurrojnë me njëri-tjetrin. Ato kanë përgjegjësi të ndryshme, por i shërbejnë të njëjtit interes: sigurisë së Republikës së Shqipërisë. Çdo mosbesim institucional të zëvendësohet me bashkëpunim, koordinim dhe komunikim profesional.

Hetimet e drejtësisë të zhvillohen tërësisht të pavarura dhe të respektohen nga të gjithë. Çështjet individuale të mos kthehen në krizë besimi ndaj shtetit dhe ndaj institucioneve të sigurisë.

Institucionet t’u tregojnë qytetarëve se sistemi di të korrigjojë vetveten e të mbrojë interesin publik. Detyra jonë është të forcojmë standardet, kontrollin, transparencën, llogaridhënien dhe bashkëpunimin institucional.

Shqipëria ka institucione, ka partnerë dhe aleatë ndërkombëtarë, ka profesionistë dhe kapacitete. Institucionet e Republikës të punojnë së bashku për të forcuar shtetin, sigurinë kombëtare dhe besimin e qytetarëve.