Presidenti Bajram Begaj liron nga detyra 5 ambasadorë

Presidenti i Republikës, Bajram Begaj, ka ndërmarrë një ristrukturim të rëndësishëm në trupën diplomatike shqiptare, duke dekretuar lirimin nga detyra të pesë ambasadorëve dhe emërimin e përfaqësuesve të rinj në disa poste kyçe.

Sipas dekretit zyrtar, nga detyra është liruar Riza Poda, i cili mbante funksionin e ambasadorit rezident në Kinë, si dhe përfaqësonte Shqipërinë në disa vende aziatike në cilësinë e ambasadorit jo-rezident, përfshirë Bangladeshin, Koresë, Vietnamit, Mongolisë dhe Tajlandës.

Po ashtu, është liruar nga detyra edhe Bardhyl Canaj, ambasador i Shqipërisë në Serbi, si dhe Sami Shiba, i cili përfaqësonte vendin në Egjipt dhe në disa shtete të Lindjes së Mesme dhe Afrikës së Veriut, përfshirë Sirinë, Jordaninë, Libinë, Palestinën, Libanin dhe Sudanin.

Lista e lirimeve përfshin gjithashtu Vasilika Hysin, përfaqësuese e Shqipërisë në misionin pranë Kombeve të Bashkuara në Gjenevë, si dhe Albana Dautllarin, ambasadore në Belgjikë dhe njëkohësisht në Luksemburg.

Në të njëjtën kohë, kreu i shtetit ka dekretuar emërime të reja. Gazmend Barbullushi është caktuar ambasador në Belgjikë dhe njëkohësisht në Luksemburg, ndërsa Albana Dautllari është emëruar në një detyrë të re si përfaqësuese e Shqipërisë pranë Bashkimi Evropian.

DEKRETI

Presidenti i Republikës, Sh. T. Z. Bajram Begaj, dekretoi sot lirimin nga detyra të:

Z. Riza Poda, Ambasador i Jashtëzakonshëm dhe Fuqiplotë i Republikës së Shqipërisë në Republikën Popullore të Kinës, rezident, si dhe Ambasador i Jashtëzakonshëm dhe Fuqiplotë i Republikës së Shqipërisë në Republikën Popullore të Bangladeshit, në Republikën Popullore Demokratike të Koresë, në Republikën Socialiste të Vietnamit, në Mongoli dhe në Mbretërinë e Tajlandës, jo rezident;

Z. Bardhyl Canaj, Ambasador i Jashtëzakonshëm dhe Fuqiplotë i Republikës së Shqipërisë në Republikën e Serbisë, rezident;

Z. Sami Shiba, Ambasador i Jashtëzakonshëm dhe Fuqiplotë i Republikës së Shqipërisë në Republikën Arabe të Egjiptit, rezident, si dhe Ambasador i Jashtëzakonshëm dhe Fuqiplotë i Republikës së Shqipërisë në Republikën Arabe të Sirisë, në Mbretërinë Hashemite të Jordanisë, Shtetin e Libisë, Shtetin e Palestinës, Republikën Libaneze dhe në Republikën e Sudanit, jo rezident;

Znj. Vasilika Hysi, Ambasador i Jashtëzakonshëm dhe Fuqiplotë i Republikës së Shqipërisë në Misionin e Përhershëm të Republikës së Shqipërisë pranë Zyrës së Kombeve të Bashkuara dhe Organizatave të Tjera Ndërkombëtare në Gjenevë, rezident;

Znj. Albana Dautllari, Ambasador i Jashtëzakonshëm dhe Fuqiplotë i Republikës së Shqipërisë në Mbretërinë e Belgjikës, rezident, si dhe Ambasador i Jashtëzakonshëm dhe Fuqiplotë i Republikës së Shqipërisë në Dukatin e Madh të Luksemburgut, jo rezident.

Gjithashtu, Presidenti i Republikës dekretoi emërimin e:

Z. Gazmend Barbullushi në detyrën e Ambasadorit të Jashtëzakonshëm dhe Fuqiplotë të Republikës së Shqipërisë në Mbretërinë e Belgjikës, rezident, si dhe Ambasadorit të Jashtëzakonshëm dhe Fuqiplotë të Republikës së Shqipërisë në Dukatin e Madh të Luksemburgut, jo rezident;

Znj. Albana Dautllari në detyrën e Ambasadorit të Jashtëzakonshëm dhe Fuqiplotë të Republikës së Shqipërisë në Misionin e Republikës së Shqipërisë pranë Bashkimit Evropian, rezident.