Presidentit Erdogan i ndodh ‘e papritura’ në OKB

Mediat turke raportojnë se Presidenti Rexhep Tajip Erdogan ka hasur probleme me mikrofonin gjatë fjalimit të tij në Asamblenë e Përgjithshme të OKB-së në Nju Jork.

Gjatë fjalës për Palestinën dhe masakrat e dhunshme në Gaza nga Izraeli, ndërsa Erdogan po fliste për situatën, audioja u ndal. Kjo ndërprerje ka zemëruar mediat turke, që e cilësuan si “sabotim të qëllimshëm”.

Pas kësaj, Drejtoria e Komunikimit e Turqisë lëshoi një deklaratë për të sqaruar situatën, duke theksuar se Presidenti Erdogan nuk u ndërpre gjatë fjalimit të tij mbi Palestinën. Në njoftimin e saj, drejtoria sqaroi se, sipas rregullave të Asamblesë, fjalimet e Kryetarëve të Shteteve dhe Qeverive kanë një kohëzgjatje prej pesë minutash, ndërsa folësit e tjerë kanë vetëm tre minuta për të folur.

Drejtoria sqaroi më tej se “nuk është e vërtetë që Presidentit nuk iu lejua të fliste ose që fjalët e tij u ndërprenë”. Ajo theksoi se kishte pasur ndërprerje të audios për shkak të duartrokitjeve, ndërsa mikrofoni i Presidentit Erdogan u fik automatikisht në fund të minutës së pestë, sipas procedurave teknike të Asamblesë.

“Presidenti e përfundoi fjalimin e tij menjëherë pas kësaj. Po ashtu, mikrofoni i Presidentit të Indonezisë u fik në përputhje me të njëjtën procedurë”, thuhet në deklaratën e Drejtorisë së Komunikimit.

Në këtë kontekst, Konferenca Ndërkombëtare e Nivelit të Lartë për Zgjidhjen Paqësore të Çështjes së Palestinës, e bashkëkryesuar nga Franca dhe Arabia Saudite, ka për qëllim të intensifikojë përpjekjet drejt një zgjidhjeje me dy shtete dhe të sigurojë një rrugë drejt paqes.