Meksikë-Afrikë e Jugut hap siparin e Botërorit 2026

Pritjes së gjatë i vjen fundi. Tetë vite pasi Kanadaja, Meksika dhe Shtetet e Bashkuara u zgjodhën organizatore të Kupës së Botës 2026, turneu më i madh i futbollit në planet nis zyrtarisht këtë të enjte, më 11 qershor.

Sytë e botës do të jenë të drejtuar nga Meksiko Siti, ku kombëtarja vendase do të përballet me Afrikën e Jugut në ndeshjen hapëse të Grupit A. Takimi zhvillohet në stadiumin historik të kryeqytetit meksikan dhe shënon nisjen e një Botërori që për herë të parë organizohet me 48 skuadra pjesëmarrëse.

Kjo përballje rikthen kujtimet e Botërorit 2010, kur Meksika dhe Afrika e Jugut u ndeshën gjithashtu në ndeshjen e parë të turneut, në një duel që përfundoi në barazim. Trajneri i Afrikës së Jugut, Hugo Broos, ka deklaruar se skuadra e tij është përgatitur maksimalisht për sfidën ndaj vendasve, të cilët do të kenë mbështetjen e dhjetëra mijëra tifozëve në shkallët e stadiumit.

Më vonë, vëmendja do të zhvendoset në Guadalajara, ku Koreja e Jugut dhe Çekia do të luajnë ndeshjen e dytë të Grupit A. Të dyja kombëtaret synojnë ta nisin me rezultat pozitiv aventurën në turneun më prestigjioz të futbollit.

Kështu hapet zyrtarisht Kupa e Botës FIFA 2026, një edicion historik që pritet të sjellë emocione të mëdha, surpriza dhe rekorde të reja në skenën më të madhe të futbollit botëror.