“Pse më sheh”, shqiptarët konfliktohen me thika në Greqi

Një festë me muzikë dhe valle kretase, e organizuar nga Shoqata e Kretasve të Metamorfosis në Athinë, përfundoi në një përleshje të dhunshme në orët e para të mëngjesit të së shtunës. Ngjarja ndodhi rreth orës 02:30 pas mesnate në kryqëzimin e rrugëve Ermou dhe Lykourgou dhe rezultoi me plagosjen e katër personave, tre prej të cilëve janë shqiptarë, ndërsa i katërti është një shtetas grek me origjinë nga Kreta.

Sipas informacioneve paraprake, gjithçka nisi nga një debat banal mes disa shqiptarëve që po largoheshin nga festa. Shkak u bë një keqkuptim i thjeshtë, që u shoqërua me fjalët: “Pse më sheh? Lëviz të kaloj”, e që shumë shpejt u kthye në një përplasje masive.

Siç raporton VoxNews, “përleshja përfshiu rreth 20 persona dhe u përdorën mjete të mprehta, duke shkaktuar panik të madh mes pjesëmarrësve të tjerë në festë.”

Të plagosurit u transportuan me urgjencë në spitalin KAT të Athinës. Më konkretisht:

Dy shqiptarë, të lindur në vitet 1999 dhe 2000, kanë marrë plagë serioze në kraharor, brinjë dhe në zonën e sqetullës;

Një grek i lindur në vitin 2000, u godit në pjesën e mesit me një mjet të mprehtë ndërsa përpiqej të ndërhynte për të ndalur përleshjen;

Një tjetër shqiptar, po ashtu i lindur në vitin 2000, ka plagë në krah, brinjë, kraharor dhe mavijosje në fytyrë.

Autoritetet greke kanë nisur hetimet për të identifikuar autorët dhe për të sqaruar tërësisht rrethanat e incidentit.