Pse po largohen nga Shqipëria miliona euro cash nga Rinasi

Një video e publikuar në rrjetet sociale ka ngjallur debat, pasi pretendohet se tregon automjete të blinduara që afrohen pranë një avioni në Aeroportin Ndërkombëtar të Rinasit pak para nisjes së tij drejt Zvicrës.

Sipas personit që ka publikuar pamjet, automjetet mbërrijnë pasi pasagjerët kanë hipur në avion dhe, nën masa të rrepta sigurie, kryhet një procedurë ngarkimi, përpara se avioni të ngrihet në fluturim.

Publikimi vjen një ditë pasi një eurodeputet hodhi akuza politike, duke pretenduar se nga Shqipëria po nxirren shuma të mëdha parash jashtë vendit. Këto pretendime nuk janë shoqëruar deri tani me prova publike apo konfirmime nga institucionet përgjegjëse.

Pas publikimit të videos janë ngritur disa pyetje që kërkojnë përgjigje zyrtare:

• Çfarë po transportohej në avion?
• Kush e autorizoi procedurën e transportit?
• Pse destinacioni ishte Zvicra?
• Cili ishte përfituesi ose pritësi i ngarkesës?
• A bëhej fjalë për transport të ligjshëm të vlerave monetare apo për një ngarkesë tjetër?

Deri në këtë moment nuk ka asnjë reagim nga Autoriteti i Aviacionit Civil, Aeroporti i Rinasit, Policia e Shtetit, Banka e Shqipërisë apo institucione të tjera kompetente lidhur me pretendimet e ngritura në rrjetet sociale. Për rrjedhojë, autenticiteti i pretendimeve dhe natyra e ngarkesës mbeten të pakonfirmuara.