“Kisha frikë se mos më grabisnin”

Kompozitori Adi Hila ka dhënë dëshminë e tij në Policinë e Tiranës, ku është marrë në pyetje për më shumë se një orë lidhur me kamerat e vendosura në pronën e tij dhe publikimin e materialeve intime.

Gjatë marrjes në pyetje, Hila ka pranuar se ka qenë ai që ka instaluar kamerat në banesë, por ka mohuar se pajisjet janë vendosur me qëllim regjistrimin e momenteve intime.

Sipas versionit të dhënë prej tij, kamerat kanë pasur funksion sigurie. Hila ka shpjeguar se në zonën ku ndodhet banesa e tij kishin ndodhur raste vjedhjesh dhe për këtë arsye kishte vendosur të monitoronte pronën.

Ai ka deklaruar se kamerat ishin shpërndarë në disa pika të pronës, si në ambientet e brendshme, ashtu edhe në hapësirat jashtë banesës, me synimin për të parandaluar apo evidentuar raste të mundshme vjedhjeje.

Kamerat ishin vendosur që në vitin 2022

Një tjetër element i përmendur në dëshminë e tij lidhet me kohën e instalimit të pajisjeve. Hila ka deklaruar se kamerat ishin vendosur që në vitin 2022, shumë përpara se materialet intime të nisnin të publikoheshin dhe të shkaktonin reagimet e ditëve të fundit.

Sipas tij, bëhej fjalë për kamera të thjeshta, të cilat nuk dispononin memorie për ruajtjen e pamjeve. Pajisjet, sipas deklarimit të tij, funksiononin online dhe pamjet nuk ruheshin në një sistem lokal.

Sa i përket publikimit të videove intime, Hila ka deklaruar se ka mësuar për ekzistencën dhe qarkullimin e tyre nga disa miq. Ata e kanë informuar se materialet kishin dalë në publik.

Dëshmia e kompozitorit tashmë është pjesë e verifikimeve që po kryhen për të sqaruar rrethanat e vendosjes së kamerave, funksionimin e tyre dhe mënyrën se si materialet intime kanë përfunduar në qarkullim.