Qeveria vendos kushte për studentët që fitojnë bursa: Duhet të punoni në Shqipëri të paktën tre vite pas diplomimit

Numri i studentëve të regjistruar në universitete publike dhe private ka rënë ndjeshëm këtë vit. Edhe pasi mbyllin studimet, shumë studentë ekselentë e jo vetëm zgjedhin që të vazhdojnë jetën e tyre jashtë vendit.

Për të mbajtur “peng” studentët që të mos largohen nga vendi menjëherë pas studimeve qeveria ka gati planin e radhës. Ministrja e Arsimit, Evis Kushi ka deklaruar ditën e sotme se studentët që pajisen me bursa studimi me vlerë sa paga minimale do të duhet të qëndrojnë e të punojnë të paktën tre vite në vendin tonë pas diplomimit.

87% e studentëve ekselentë kanë vendosur të studiojnë këtu në vendin tonë. Në bashkëpunim me universitetet po punojmë për të rritur cilësinë e arsimit të lartë dhe që Shqipëria të mos rrezikojë që shumë prej jush t’i ketë larg. Kemi ofruar bursa studimi me vlerë sa paga minimale për studentë të shkëlqyer edhe për ata studentë që kanë zgjedhur programet prioritare apo ata që kanë fituar olimpiada ndërkombëtare. Por ama kemi vendosur një kusht që pas diplomimit të vazhdoni të qëndroni këtu të punonin edhe për të paktën tre vite.