Radhë automjetesh në kufirin me Greqinë, fluks i madh në Qafë Botë

Pika e kalimit kufitar të Qafë Botës po përjeton një fundjavë të ngarkuar, me një rritje të ndjeshme të numrit të udhëtarëve dhe automjeteve që lëvizin mes Shqipërisë dhe Greqisë.

Fluksi i shtuar ka sjellë krijimin e radhëve në të dyja anët e kufirit, ndërsa qytetarët presin për përfundimin e kontrolleve dhe procedurave të kalimit.

Gjatë 24 orëve të fundit, përmes Qafë Botës kanë hyrë dhe kanë dalë rreth 10 mijë shtetas shqiptarë dhe të huaj. Sipas të dhënave nga pika kufitare, ngarkesa më e madhe është aktualisht në drejtim të Shqipërisë.

Situata lidhet me kulmin e sezonit turistik, periudhë gjatë së cilës rriten ndjeshëm lëvizjet e pushuesve dhe turistëve, por edhe të qytetarëve që udhëtojnë mes dy vendeve.

Për të përballuar numrin e lartë të udhëtarëve, në anën shqiptare procedurat kufitare po kryhen në katër sportele, ndërsa pala greke ka në funksion dy sportele.

Qafë Bota është një nga pikat kryesore të kalimit kufitar mes Shqipërisë dhe Greqisë dhe gjatë fundjavave të sezonit veror përballet rregullisht me flukse të larta.

Autoritetet kufitare po vijojnë punën për menaxhimin e situatës dhe për përshpejtimin e procedurave, me synim uljen e radhëve dhe shkurtimin e kohës së pritjes për udhëtarët.