Kryeministri Edi Rama ka zhvilluar një takim me strukturat e PS në Njësinë 4 në Tiranë, në kuadër të turit që ai e ka cilësuar si një proces “rienergjizimi” të organizatës në kryeqytet.
Ky angazhim vjen menjëherë pas mbledhjes së Asamblesë Kombëtare të PS-së, ku u vendos riformatimi i ekipit drejtues për Tiranën, duke sinjalizuar një fazë të re organizimi dhe përgatitjeje për zgjedhjet e ardhshme vendore.
Vëmendjen e mori prania e Ogerta Manastirliut në krah të Ramës gjatë këtij takimi, në një kohë kur Erion Braçe ka shprehur publikisht interesin për të kandiduar për Bashkinë e Tiranës. Kjo dalje e përbashkët është interpretuar si një sinjal politik, ndonëse nuk ka një qëndrim zyrtar mbi këtë çështje.
Ndërkohë, sipas vendimeve të fundit të Asamblesë, drejtimi i Njësisë 4 i është besuar Blerina Gjylametit dhe Eduard Shalsit, të cilët do të kenë rol kyç në organizimin e strukturave në këtë zonë.
Megjithatë, prania e Manastirliut përkrah Ramës në këtë aktivitet ka shtuar spekulimet se ajo mund të jetë një nga emrat favoritë të kryeministrit për garën për Bashkinë e Tiranës, duke e bërë edhe më të fortë debatin brenda radhëve të socialistëve.
