Rama i “del para” investigimit të Rai3: E dua Giorgio, por më shumë dua të vërtetën

Pas publikimit të lajmeve për përmbajtjen e emisionit investigativ ‘Report’ që do të transmetohet sonte në Rai3, ku është bërë me dije se ish-krahu i djathtë i Ramës, Arben Ahemetaj ka folur për lidhjet e kreut të qeverisë me mafien, takimet me bosët e drogës në zyrë, licencat e kazinove për ta dhe skemat e pastrimit të parave përmes biznesit të ndërtimit, Edi Rama ka publikuar një status në Facebook, ku lajmëron transmetimin e intervistës së tij me gazetarin Italian mbrëmjen e sotme. “E dua Giorgio, por më shumë dua të vërtetën”, – shkruan Rama, i cili mesa duket kërkon të thotë se ajo që thotë besoni vetë pjesën ku kam folur unë, dhe jo atë të ish-krahut tim të djathtë.

“Grupet kriminale marrin tendera publikë përmes “presta nome”, dhe pastrojnë paratë në Shqipëri përmes sektorit të ndërtimit duke u koordinuar me Edi Ramën”, kjo është një nga paralajmërimet të cilat kreu i qeverisë do të përpiqet ta sfumojë, siç ka bërë edhe në intervistë, ku mësohet se ka thënë mos i besoni Arben Ahmetajt.

Postimi i Ramës në FB:

“VOGLIO BENE A GIORGIO MA VOGLIO DI PIU A LA VERITA”*

SONTE 20:00

“RAI3 Report” bëri para disa javësh një reportazh ku përzieu në të njëjtin kazan prodhimet e sherrit politike italian mbi marrëveshjen Itali-Shqipëri për qendrën e pritjes së tremijë migrantëve në Shëngjin, me llumin e eksportuar nga kanalet e ujrave të zeza politike e mediatike të Tiranës, duke cënuar imazhin e Shqipërisë dhe dinjitetin e shqiptarëve. Dihet “lufta” që pasoi e që u bë temë e mediave italiane pas kundërvënies sime ndaj asaj llumnaje.

Drejtori i programit “Report” iu përgjigj pozitivisht ftesës sime publike drejtuar atij personalisht, për të ballafaquar faktet në sytë e audiencës së RAI3. Ramë dakord, që përveç copave të intervistës së bërë në zyrën time, të cilat ata do t’i marrin e do t’i presin dhe qepin sipas skenarit të tyre (me qëllimin lehtësisht të lexueshëm të vazhdimit të përzierjes në të njëjtin kazan të sherrnajës politike italiane me llumin e eksportuar nga Tirana) intervista e pacensuruar do të publikohet e plotë njëkohësisht në rrjetet sociale të Report, si edhe këtu në këtë faqe.

Sonte në mbrëmje shikoni, dëgjoni e gjykoni vetë, unë s’po bëj asnjë koment. Nesër flasim, këtu jemi prapë

*Kujdes e kam fjalën për Giorgio-n, gazetarin në foto, jo për Giorgia-n, shënjestrën kryesore të “RAI3 Report”